Ijtimoiy tarmoqlarda Umra ziyoratini ado etib kelgan ayolni kutib olishda uning qadami ostiga sholchalar, kiyimlar to‘shalgani, yosh bola ziyoratchining oyog‘i ostiga yotqizilishi aks etgan videolavha tarqalib, ko‘pchilik e’tiroziga sabab bo‘ldi. O‘zbekiston musulmonlari idorasi huzuridagi Fatvo markazi ushbu video bo‘yicha munosabat bildirib, bu kabi amallar islom diniga mutlaqo zidligini ma’lum qildi.
“Haqiqatan, Umra ibodatiga borib kelayotgan ayrim ziyoratchilar va ularning yaqinlari bilgan yoki bilmagan holda riyokorlikka yo‘l qo‘yishi kuzatilmoqda. Ba’zi hollarda Umra safaridan kelganlarni dabdaba-yu as’asa ila kutib olish, ko‘cha boshidan payondozlar solish holati ko‘paymoqda. Bu kabilar dinimizga mutlaqo zid bo‘lib, unday ishlarni qilayotganlar o‘ta johil va nodon kishilardir. Ehtimol, bu ishlari bilan ular o‘zlarining Allohning baytiga bo‘lgan ehtiromlarini yoki uni tavof qilib kelgan kishiga nisbatan hurmatlarini ifodalamoqchidirlar. Lekin, ibodatga hurmat-ehtirom bu tarzda namoyon qilinmaydi. Aksincha, bu riyokorlik va og‘ir gunoh.
Aslida, dinimizda ibodatni odamlarning ko‘zidan yashirishga, ko‘z-ko‘z qilmaslikka buyuriladi. Riyokorlik — odamlar ko‘rishi uchun bir ishni qilish. Chunki undan Allohning roziligi emas, balki bandalarning ko‘rishi nazarda tutilgan bo‘ladi. Musulmon kishi har bir ishni qilishda Alloh taoloning roziligini qasd qilishi lozim. Agarda kishi bir amalga odamlar meni ko‘rib qo‘ysin, degan qasd bilan kirishsa, shu amali bekorga ketib, ustiga-ustak gunohkor ham bo‘ladi”, — deyiladi munosabatda.
Fatvo markazi dabdabali marosimlar uchun qiladigan sarf-xarajatlarni tejab, yon-atrofdagi muhtoj kishilarga berishni, farzandlar talim olishi yo‘lida sarflashni tavsiya etdi.
Mavzuga doir:
Izoh (0)