Саудия Арабистони сўнгги йилларда мамлакатдаги аёлларга кенгроқ имкониятлар тақдим этиш бўйича катта ютуқларга эришди. Бу саъй-ҳаракатлар валиаҳд шаҳзода Муҳаммад бин Салмоннинг қиролликдаги аёлларнинг мавқеини ошириш ва тенг имкониятларни тақдим этишга қаратилган Vision 2030 ташаббуси доирасида амалга ошмоқда.
Саудия Арабистони ҳозиргача беш нафар саудиялик аёлни Қиролликнинг дунё мамлакатларидаги элчи сифатида танлаб олган. Қуйида улар ҳақида маълумот берилади.
1. Малика Рима бинт Бандар Ал Сауд
Малика Рима бинт Бандар 2019 йилда Саудия Арабистонининг биринчи аёл элчиси бўлди, ўшанда валиаҳд шаҳзода Муҳаммад бин Салмон қирол ўринбосари сифатида қироллик фармони билан уни АҚШда элчи этиб тайинлади.
Малика Рима аввалроқ Саудия Арабистони Бош спорт бошқармасида режалаштириш ва ривожланиш бўйича муовини ва ҳокимиятнинг аёллар ишлари бўйича вице-президенти лавозимларида ишлаган.
У, шунингдек, Оммавий иштирок федерацияси президенти бўлиб, Саудия Арабистонида мулти спорт федерациясини бошқарган биринчи аёл ҳисобланади. Малика Рима фаолияти давомида аёлларнинг имкониятларини кенгайтириш тарафдори бўлган ва Саудия аёллари учун Қиролликдаги имкониятларни кенгайтиришга ҳаракат қилган.
Унинг отаси шаҳзода Бандар бин Султон ҳам 1983 йилдан 2005 йилгача мамлакатнинг АҚШдаги элчиси бўлиб ишлаган.
2. Амал Яҳё ал-Моаллими
2020 йилда Амал ал-Моаллими Саудия Арабистонининг Норвегиядаги элчиси этиб тайинланди ва бу билан Қиролликнинг иккинчи аёл элчисига айланди.
Ал-Моаллими малика Нора бинт Абдул Раҳмон университетида инглиз тили бўйича бакалавр ва АҚШнинг Денвер университетида оммавий коммуникация ва медиа йўналиши бўйича магистр даражасига эга.
2019 йилда Саудия Арабистони Инсон ҳуқуқлари бўйича комиссиясида ташкилотлар ва халқаро ҳамкорлик бўйича бош директор лавозимида ишлаган. Бундан аввал у Саудиядаги Қирол Абдулазиз номидаги Миллий мулоқот маркази бош котибининг ёрдамчиси бўлган.
3. Инас ал-Шаҳван
Инас ал-Шаҳван 2021 йил апрель ойида Саудия Арабистонининг Швеция ва Исландиядаги элчиси сифатида фаолият олиб борган. У қироллик вакили этиб тайинланган учинчи саудиялик аёлдир.
Ал-Шаҳван Австралия университетида халқаро муносабатлар бўйича магистр даражасига, шунингдек Гарвард университетининг Ривожланаётган етакчилик дастури сертификатига эга.
2007 йилда ал-Шаҳван Ташқи ишлар вазирлигида дипломатик корпусдан элчи бўлган биринчи аёл бўлди. Шунингдек, у ТИВда бир қанча лавозимларда ишлаган, жумладан, ташқи ишлар вазири ўринбосарининг сиёсий масалалар бўйича маслаҳатчиси бўлган. ТИВнинг сиёсий ва иқтисодий масалалар бўйича департаментида бўлим мудири лавозимини эгаллаган биринчи аёл ҳисобланади.
4. Ҳаифа ал-Жадеа
Ҳаифа ал-Жадеа 2023 йил 3 январда Қиролликнинг Европа Иттифоқи ва Атом энергияси бўйича Европа ҳамжамиятидаги элчиси ва миссияси раҳбари этиб тайинланди.
Ал-Жадеа Колумбия университетида конфликтни ҳал қилиш ва музокаралар бўйича магистр даражасини ва Сиракуза университетида халқаро муносабатлар бўйича магистр даражасини, шунингдек, Сиракуза университетида журналистика бўйича бакалавр даражасини олган.
У Саудия тадқиқот ва медиа гуруҳи ижрочи гуруҳининг саккиз аъзосидан бири ва «SRMG Think» компаниясининг бош директори бўлган. Элчи Саудия Арабистонининг 2030 йилга мўлжалланган Vision дастури доирасидаги ташаббуслар устида ишлаш учун Ар-Риёдга кўчиб ўтишдан олдин Бирлашган Миллатлар Ташкилотининг (БМТ) Террорга қарши кураш марказида ишлаган.
У, шунингдек, БМТ Хавфсизлик Кенгашида Қироллик вакили бўлган ва Саудия Арабистони Туризм вазирлигининг Халқаро алоқалар бош бошқармасига масъул бўлган.
5. Нисрин ал-Шибел
Нисрин бинт Ҳамад ал-Шибел Саудия Арабистонининг Финляндиядаги элчиси этиб 2023 йил 3 январь куни ал-Ямама саройида тайинланди. У қирол Салмон бин Абдулазиз ҳузурида қасамёд қилган.
Қасамёд маросимидан сўнг янги тайинланган элчи ўзининг расмий Twitter саҳифасида қиролга миннатдорлик билдирган.
«Қирол Салмон бин Абдулазиз Ал Сауд ва валиаҳд шаҳзода олийларига юксак ишонч учун ўз миннатдорлигимни билдираман. Уларнинг мақсадларини рўёбга чиқариш ва ишимни тўлиқ бажаришим учун Ундан ёрдам сўрайман. Шунингдек, ташқи ишлар вазирлигига қўллаб-қувватлагани учун миннатдорлик билдираман», — деб ёзган у.
Изоҳ (0)