Rossiya prezidenti Vladimir Putin 4-yanvar kuni Atlantika va Hind okeaniga “Sirkon” gipertovushli qanotli raketalari bilan qurollangan fregatni jo‘natdi. Bu haqda Reuters xabar berdi.
Putinning ta’rifiga ko‘ra, dunyoda mazkur qanotli raketaga teng keladigani yo‘q. Rossiya prezidenti mudofaa vaziri Sergey Shoygu va “Admiral Gorshkov” fregati qo‘mondoni Igor Kroxmal bilan videoselektor yig‘ilishida fregat “Sirkon” gipertovushli quroli bilan jihozlanganini aytdi.
“Bu safar kema o‘xshashi bo‘lmagan eng yangi gipertovushli raketa tizimi ‘Sirkon’ bilan jihozlangan. Kema ekipajiga Rossiya ravnaqi yo‘lida xizmat qilishda muvaffaqiyat tilayman”, — dedi Putin.
Shoyguning aytishicha, Gorshkov Atlantika va Hind okeanlari hamda O‘rta Yer dengizi tomon suzib ketadi.
“ ‘Sirkon’ bilan qurollangan ushbu kema dengizda ham, quruqlikda ham dushmanga aniq va kuchli zarbalar berishga qodir”, — deydi Rossiya mudofaa vaziri.
Shoyguning aytishicha, “Sirkon” gipertovushli raketalar har qanday raketaga qarshi mudofaa tizimini yengib o‘ta oladi. Raketalar tovush tezligidan to‘qqiz baravar tez uchadi va 1000 kilometrdan ortiq masofani bosib o‘tadi.
Hozirda Rossiya, Xitoy va AQSH gipertovushli qurollar poygasida. Chunki ularning raketalari tovush tezligidan besh baravar yuqori va manyovr qobiliyati tufayli har qanday raqib ustidan ustunlikka erisholadi.
2022-yil 19-fevralda Rossiya yadroviy mashg‘ulotlar o‘takzgandi, jarayonni Putin belaruslik hamkasbi Aleksandr Lukashenko bilan birgalikda kuzatgandi. O‘shanda mashg‘ulotlar doirasida “Kinjal” gipertovushli raketalari, “Kalibr” qanotli raketalari va “Sirkon” gipertovushli raketasi dengiz va quruqlikdagi nishonlarga qarata uchirilgandi.
Izoh (0)