Qozog‘istonda kuchli qor bo‘roni tufayli 130 ga yaqin avtomobil yo‘li yopildi (video)

Qozog‘istonda ob-havo sharoitining yomonlashishi munosabati bilan respublika va viloyat ahamiyatiga ega 127 ta avtomobil yo‘llari yopildi. Bu haqda Tengrinews respublika Favqulodda vaziyatlar vazirligiga tayanib xabar berdi.

“Ob-havo sharoitining yomonlashishi (bo‘ron, atrofni ko‘rishning yomonlashuvi, qor) tufayli 127 ta yo‘l uchastkasi yopilgan, shundan 49 tasi respublika, 78 tasi hududiy ahamiyatga ega”, — deyiladi Favqulodda vaziyatlar vazirligi saytida e’lon qilingan xabarda.

Qayd etilishicha, yo‘llardagi favqulodda vaziyatlarni bartaraf etish bo‘yicha respublika shtabi tuzilgan, viloyatlarda ham shunday shtablar faoliyat yuritmoqda.

Yo‘llarning yopilgan uchastkalarida 838 ta vaqtinchalik isitish punktlari tayyorlandi, 87 ta texnika ham shay holatda.

“420 kishi vaqtinchalik isitish punktlarida, ularning 69 nafari bolalar”, — deyiladi xabarda.

Respublika Favqulodda vaziyatlar vazirligi ma’lumotlariga ko‘ra, nazorat-o‘tkazish punktlarida 600 ta avtomobil to‘planib qolgan.

Yo‘l xizmatlari tozalash ishlarini olib bormoqda. Qutqaruv ishlariga jami 1000 ga yaqin odam va turli bo‘limlardan 600 ga yaqin texnika jalb etilgan.

Qozog‘iston Favqulodda vaziyatlar vazirligining ta’kidlashicha, bir sutka davomida qutqaruv bo‘linmalari tomonidan Jambil, Turkiston, Qo‘stanay, Qarag‘anda va Abay viloyatlarida 690 dan ortiq odam yo‘llardan qutqarilgan va evakuatsiya qilingan.