Rossiya prezidenti Vladimir Putin Madaniyat vazirligiga Rossiya kinoteatrlarida “maxsus harbiy operatsiya”ga hamda “neonatsistik va neofashistik mafkura tarqalishiga qarshi kurash”ga bag‘ishlangan hujjatli filmlarni namoyish qilishni topshirdi.
Shuningdek, idoraga vatanparvarlik ruhidagi hujjatli kino festivalini tashkillashtirish yuklatildi. Bu haqdagi takliflarni madaniyat vaziri Olga Lyubimova 2023-yil 1-fevralga qadar ishlab chiqishi kerak.
Prezidentning noyabr oyida bo‘lib o‘tgan askarlar onalari bilan uchrashuvi yakunlariga ko‘ra tuzilgan topshiriqlarida, shuningdek, Mudofaa vazirligi rossiyalik hujjatli film ustalariga “maxsus operatsiya”da qatnashib, jasorat va qahramonlik ko‘rsatganlar haqida kinematografik material tayyorlashda yordam berishi kerakligi aytiladi.
Bundan tashqari, Madaniyat vazirligi va Ta’lim vazirligi 2023-yil 1-aprelgacha “maxsus operatsiya” ishtirokchilari haqida “jamoat makonlari, art-obyektlar va maktab muzeylari”ni tashkil qilib, Rossiya maktablarida bu mavzuda darslar o‘tkazishi kerak.
Izoh (0)