Dunyoda kattaligi bo‘yicha ikkinchi o‘rinda turuvchi Niagara sharsharasi so‘nggi 50 yil ichidagi eng kuchli qor bo‘ronidan keyin qisman muzlab qoldi. Bir necha kundan keyin muzga aylangan tabiiy majmua ustida yorqin kamalak hosil bo‘ldi va ko‘plab sayyohlarni o‘ziga jalb qildi. Bu haqda Daily Mail xabar bermoqda.
Sharsharaga yaqin xiyobon tanib bo‘lmaydigan darajada o‘zgarib ketdi: o‘rindiqlar, daraxtlar va sharshara atrofidagi panjaralarni muzlab, qalin qor bilan qoplandi. Sharsharaning o‘zida ham katta muz palaxsalarini ko‘rish mumkin edi.
Niagara tepadan oqib tushadigan suv hajmi tufayli to‘liq muzlab qololmaydi, deyiladi xabarda. Har soniyada jar tepasidan 3160 tonna suv oqib tushadi.
Qor bo‘roni AQSHga 23-dekabr kuni yopirildi. Nyu-York shtatida favqulodda holat e’lon qilindi.
So‘nggi ma’lumotlarga ko‘ra, AQSHda qor bo‘roni va sovuq havo oqibatida 78 kishi halok bo‘ldi. O‘lim holatlari Kolorado, Kanzas, Kentukki, Ogayo, Nebraska, Missuri, Oklaxoma, Michigan, Janubiy Karolina, Tennessi, Viskonsin, Illinoys va Vermontda qayd etildi. Nyu-York hukumati endi havo ilishi natijasida shtatda suv toshqini yuz berishidan xavfsiramoqda.
Bo‘ron chog‘ida havo harorati -45 darajagacha tushib ketdi. Bir necha kishi o‘z avtomobillarida o‘lik holda topilgan, ba’zilar qor tozalash vaqtida yurak bilan bog‘liq muammolar yuz bergani tufayli vafot etgan.
Izoh (0)