Norvegiya 2023-yilning bahorigacha Ukrainani zarur gaz bilan ta’minlashga tayyor. Bu haqda 3-yanvar kuni Ukraina prezidenti Vladimir Zelenskiy ukrainaliklarga kechki murojaatida ma’lum qildi.
Zelenskiy Norvegiyaning Yevropani himoya qilishdagi roli tarixiy bo‘lishi mumkinligini ta’kidladi.
“Qabul qilingan va hali yana tayyorlanayotgan juda kuchli qarorlar uchun Norvegiyaga rahmat. Qurolli yordamni ham nazarda tutyapman. Agar biz hozir aytayotgan barcha narsani amalga oshirsak, Norvegiyaning roli Yevropani himoya qilishda chinakam tarixiy ahamiyatga ega bo‘lishi mumkin”, — dedi Zelenskiy.
Ukraina prezidentining qo‘shimcha qilishicha, bu Ukraina energetika tizimini qo‘llab-quvvatlashga ham tegishli.
“Xususan, Norvegiyaga Ukrainani qish uchun zarur miqdorda gaz bilan ta’minlashda yordam berishga tayyorligi uchun minnatdorlik bildiraman”, — dedi prezident.
3-yanvar kuni Zelenskiy Norvegiya bosh vaziri Gar Stere bilan muzokaralar o‘tkazgan va unga qishki gazni moliyalashtirayotgani uchun minnatdorlik bildirgan.
Noyabr oyida Norvegiya Ukrainaga gaz uchun qariyb 200 million dollar ajratgani haqida xabar berilgan edi.
Izoh (0)