Қозоғистонда об-ҳаво шароитининг ёмонлашиши муносабати билан республика ва вилоят аҳамиятига эга 127 та автомобиль йўллари ёпилди. Бу ҳақда Tengrinews республика Фавқулодда вазиятлар вазирлигига таяниб хабар берди.
«Об-ҳаво шароитининг ёмонлашиши (бўрон, атрофни кўришнинг ёмонлашуви, қор) туфайли 127 та йўл участкаси ёпилган, шундан 49 таси республика, 78 таси ҳудудий аҳамиятга эга», — дейилади Фавқулодда вазиятлар вазирлиги сайтида эълон қилинган хабарда.
Қайд этилишича, йўллардаги фавқулодда вазиятларни бартараф этиш бўйича республика штаби тузилган, вилоятларда ҳам шундай штаблар фаолият юритмоқда.
Йўлларнинг ёпилган участкаларида 838 та вақтинчалик иситиш пунктлари тайёрланди, 87 та техника ҳам шай ҳолатда.
«420 киши вақтинчалик иситиш пунктларида, уларнинг 69 нафари болалар», — дейилади хабарда.
Республика Фавқулодда вазиятлар вазирлиги маълумотларига кўра, назорат-ўтказиш пунктларида 600 та автомобиль тўпланиб қолган.
Йўл хизматлари тозалаш ишларини олиб бормоқда. Қутқарув ишларига жами 1000 га яқин одам ва турли бўлимлардан 600 га яқин техника жалб этилган.
Қозоғистон Фавқулодда вазиятлар вазирлигининг таъкидлашича, бир сутка давомида қутқарув бўлинмалари томонидан Жамбил, Туркистон, Қўстанай, Қарағанда ва Абай вилоятларида 690 дан ортиқ одам йўллардан қутқарилган ва эвакуация қилинган.
Изоҳ (0)