AQSH va Janubiy Koreya KXDR yadro qurolidan foydalanishga qaror qilgan taqdirda, unga nisbatan qo‘llaniladigan javob choralarini ishlab chiqmoqda. Bu haqda Oq uy matbuot kotibi Karin Jan-Pyer jurnalistlar uchun kundalik brifingda ma’lum qildi.
Uning qayd etishicha, tomonlar qo‘shma yadroviy mashg‘ulotlarni muhokama qilgani yo‘q, chunki Koreya Respublikasi yadro quroliga ega bo‘lmagan mamlakat hisoblanadi.
Shu bilan birga, uning ta’kidlashicha, 2022-yil noyabrida Kambodjadagi uchrashuvdan keyin AQSH prezidenti Jo Bayden va Janubiy Koreya prezidenti Yun Sok Yol o‘z jamoalariga bir qator ssenariylarga, shu jumladan, Pxenyan tomonidan yadro quroli qo‘llanilishiga qarshi samarali, muvofiqlashtirilgan javob harakatini rejalashtirishni topshirgan.
Uning so‘zlariga ko‘ra, ikki mamlakat jamoalari aynan shu masala ustida ish olib bormoqda. AQSH Janubiy Koreya bilan alyansga to‘liq sodiq, unga o‘z kuch va vositalarining butun spektrini taqdim etib, unga tiyib turishda ko‘mak berishga tayyor, deya qo‘shib qo‘ydi u.
Avvalroq Janubiy Koreya prezidenti Yun Sok Yol Chosun Ilbo gazetasiga bergan intervyusida Seul va Vashington Amerika yadroviy qurollari ishtirokida qo‘shma mashg‘ulotlar o‘tkazish imkoniyatini muhokama qilayotganini aytgandi.
Biroq AQSH prezidenti Jo Bayden Janubiy Koreya hukumati bilan qo‘shma yadroviy mashg‘ulotlarni muhokama qilmayotganini aytdi. Janubiy Koreya hukumati bilan qo‘shma mashg‘ulotlar masalasini muhokama qilgan-qilmagani haqidagi savolga javob berayotib, u: “Yo‘q”, — dedi.
31-dekabr kuni KXDR Mehnat partiyasi yalpi majlisida Kim Chen In mamlakat yadroviy arsenalini kuchaytirish zaruriyati oshganini, chunki Janubiy Koreya “shak-shubhasiz dushman”ga aylanganini ma’lum qildi. Uning bayonotiga javoban Janubiy Koreya yadroviy zarba amalga oshirilgan taqdirda, Kim Chen In rejimiga nuqta qo‘yilishi haqida ogohlantirdi.
Izoh (0)