“24.kg” Qirg‘iziston prezidenti Sadir Japarovning kiyim-kechaklari narxini hisoblab chiqdi, ularning qiymati prezidentning rasmiy daromadidan bir necha barobar balandroq bo‘lib chiqdi.
Avvalroq Qirg‘iziston Soliq xizmati mansabdor shaxslarning 2021-yil yakuni bo‘yicha daromadlari to‘g‘risidagi deklaratsiyalarini e’lon qilgan edi. Sadir Japarov 2021-yilda daromadi 997 803 qirg‘iz somini (taxminan 11500 dollar) tashkil qilganini ko‘rsatgan. Bu prezidentning oylik daromadi 83,1 ming qirg‘iz somiga (taxminan 930 dollar) teng bo‘lganini anglatadi.
Hujjatga ko‘ra, uning tasarrufida qishloq xo‘jaligiga mo‘ljallangan 0,6 gektar yer uchastkasi va garaj bor.
Ko‘chmas mulk yoki transport vositasi haqida ma’lumot berilmagan. Shuningdek, davlat rahbarining eng yaqin qarindoshlari daromadlari va mol-mulki haqida ham ma’lumot yo‘q.
Ayni vaqtda esa davlat rahbari Kulanak GES qurilish joyiga kiyib kelgan kurtkaning narxi uning yillik daromadidan kattaroq. U 1 million 364 ming som (14 750 dollar) bo‘lib, bu Sadir Japarovning 15 ta oylik maoshiga teng demakdir.
Avvalroq Japarov Germaniyadan davlat budjetiga sotib olingan Airbus H145 vertolyotini sinovdan o‘tkazish jarayonida kiygan kurtkasi muhokamaga sabab bo‘lgan edi. U Loro Piana brendining mo‘ynali kurtkasida ko‘rinish bergan, “Vipavenue.ru” saytida uning narxi 14 177 yevro ekanini ko‘rish mumkin. Bu prezidentning garderobidagi yagona qimmatbaho kiyim emas, deyiladi xabarda.
Yaqinda Oliy Yevrosiyo iqtisodiy kengashi yakuniy majlisiga Qirg‘iziston rahbari qizil tagcharmli Christian Louboutin fransuz brendi oyoq kiyimida kelgandi, uning narxi 86,5 ming som (1010 dollar) bo‘lib, bu ham prezidentning oylik maoshidan ko‘p demakdir.
8-fevralda ham Qirg‘iziston prezidenti poytaxt bozorlaridagi tadbirkorlar bilan nazorat-kassa mashinalarini joriy etish yuzasidan muloqot o‘tkazganda kiygan kurtkasi muhokamalarga sabab bo‘lgandi. Ijtimoiy tarmoqlarda prezidentning kurtkasi Italiyaning “Stefano Ricci” brendidan bo‘lib, uning narxi 5900 dollar ekani haqida ma’lumot tarqalgan.
2022-yil avgustida davlat rahbarining Ermenegildo Zegna brendiga tegishli kardigani ham ijtimoiy tarmoqlarda shov-shuvga sabab bo‘lgandi, uning narxi 5 ming dollar bo‘lib, bu Japarovning oilik maoshidan besh baravar ko‘pdir.
Bundan avval ham Sadir Japarov va uning rafiqasi Oygul Japarovaning qimmatbaho chang‘i libosi muhokamalarga sabab bo‘lgandi. Ularning ustidagi liboslari qimmatbaho markali kurtkalarga juda o‘xshashligi aytilgan.
Taxminlarga ko‘ra, prezident egnidagi kurtka Lynn brendiga tegishli bo‘lib, 1099 yevro turadi. Birinchi xonimning ustidagi kurtka esa Toni Sailer brendiniki bo‘lib, narxii taxminan 1600 dollarni tashkil qiladi.
O‘tgan yilning o‘zida Sadir Japarovning egnida qariyb 2 million 500 ming som (29 ming dollardan ziyod)lik kiyim-kechaklarni ko‘rishgan. Bu uning yillik daromadidan 2,5 baravar ortiqroq demakdir.
Izoh (0)