Germaniya Tashqi ishlar vazirligi Polsha diplomatik missiyasining Ikkinchi jahon urushidagi yo‘qotishlar uchun tovon to‘lash talabi bildirilgan notasini muhokama qilishdan bosh tortdi. Diplomatik missiya saytidagi bayonotga ko‘ra, 3-yanvar kuni Polsha TIV Germaniyadan shunday javob notasini olgan.
“Germaniya hukumatining fikricha, harbiy yo‘qotishlarni qoplash va tovon to‘lash masalasi yopiqligicha qolmoqda. Germaniya hukumati bu borada muzokaralar olib borish niyatida emas”, — deyiladi bayonotda.
Ammo, Polsha Tashqi ishlar vazirligi ma’lumotlariga ko‘ra, Polsha hukumati “1939—1945-yillardagi Germaniya agressiyasi va bosqinchiligi oqibatida yuzaga kelgan debitorlik qarzlarini hal qilish” bo‘yicha harakatlarni davom ettiradi.
Polsha TIVning yana bir bayonotida Varshava Birlashgan Millatlar Tashkilotidan bu borada yordam so‘ragani ma’lum qilindi. “Polsha Germaniya hukumati Polsha talablariga munosib javob beradi deb umid qilmoqda. 1973-yildan beri BMT a’zosi bo‘lgan Germaniya federativ respublikasi Polshaning Germaniyadan ko‘rgan yo‘qotishlarini qoplash uchun tizimli choralar ko‘rishi kerak. Urush tugaganidan keyin hal etilmay qolgan muammoga xalqaro hamjamiyatning e’tiborini qaratish uchun BMTda munozara o‘tkazilishini intizorlik bilan kutamiz”, — deyiladi xabarda.
Germaniya hukumati Ikkinchi jahon urushi uchun javobgarlikni tan olganiga qaramay, 1953-yilgi Polsha Seymi rezolyutsiyasiga ishora qilib, Polshaga tovon puli to‘lashni bir necha bor rad etgan. O‘sha hujjatda Varshava GFR yetkazilgan zararni qoplash bo‘yicha barcha majburiyatlarini bajarganini ta’kidlagan edi. Bundan tashqari, 1991-yilda Berlin yaxshi qo‘shnichilik shartnomasi bo‘yicha yana 1,3 milliard yevro to‘lagan.
Polsha 2022-yilning oktabr oyi boshida Germaniyaga tovon to‘lash bo‘yicha nota yuborgan edi. Undan avval “Qonun va adolat” partiyasi rahbari Yaroslav Kachinskiy Varshava Ikkinchi jahon urushida yetkazilgan zarar uchun Berlindan 6,2 trillion zlotiy (taxminan 1,3 trillion dollar) tovon puli talab qilishini aytgandi. Uning so‘zlariga ko‘ra, bu miqdor “eng konservativ usul” bilan hisoblangan va asl summa undan ham ko‘proq bo‘lishi mumkin.
Izoh (0)