Qirg‘iziston prezidenti Sadir Japarov Germaniyadan davlat budjetiga sotib olingan Airbus H145 vertolyotini sinovdan o‘tkazish jarayonida kiygan kurtkasi muhokamaga sabab bo‘ldi. Bu haqda Kaktus media xabar berdi.
Aviatexnika sinovida prezident va Milliy xavfsizlik davlat qo‘mitasi xizmati rahbari Qamchibek Tashiyev qimmat brend kiyimlarida omma oldiga chiqqani aniqlangan. Samolyot taqdimotida Tashiyevning egnida Moncler brendining Bauges modeliga juda o‘xshash kurtka bo‘lgan. Moncler veb-saytida uning narxi 1590 yevro yoki 142 506 som ekani keltiriladi.
Sadir Japarov esa Loro Piana brendining mo‘ynali kurtkasida ko‘rinish bergan, “Vipavenue.ru” saytida uning narxi 14 177 yevro ekanini ko‘rish mumkin.
8-fevralda ham Qirg‘iziston prezidenti poytaxt bozorlaridagi tadbirkorlar bilan nazorat-kassa mashinalarini joriy etish yuzasidan muloqot o‘tkazganda kiygan kurtkasi muhokamalarga sabab bo‘lgandi. Ijtimoiy tarmoqlarda prezidentning kurtkasi Italiyaning “Stefano Ricci” brendidan bo‘lib, uning narxi 5900 dollar ekani haqida ma’lumot tarqalgan.
Bundan avval ham Sadir Japarov va uning rafiqasi Oygul Japarovaning qimmatbaho chang‘i libosi muhokamalarga sabab bo‘lgandi. Ularning ustidagi liboslari qimmatbaho markali kurtkalarga juda o‘xshashligi aytilgan.
Taxminlarga ko‘ra, prezident egnidagi kurtka “Lynn” brendiga tegishli bo‘lib, 105 ming som (taxminan 13 million so‘m) turadi. Birinchi xonimning ustidagi kurtka esa “Toni Sailer” brendiga tegishli bo‘lib, naxri taxminan 140 ming somni (taxminan 20 million so‘m) tashkil qilgan.
Izoh (0)