Kanada 2022-yilda rekord darajadagi 431 645 immigrantni qabul qildi va yangi rezidentlarni jalb qilish rejasini to‘liq bajardi, deb xabar bermoqda mamlakatning Immigratsiya, qochqinlar va fuqarolik vazirligi.
Hisobotda qayd etilishicha, avvalgi rekord 2021-yilda 401 ming immigrant bo‘lgan. Kanada bu qadar ko‘p sonli yangi doimiy rezidentlarni yuz yildan ko‘proq vaqt oldin, 1913-yilda qabul qilgandi.
Kanada hukumati 2022-yilda doimiy yashash, vaqtinchalik yashash va fuqarolikni olish uchun 5,2 millionga yaqin murojaatni ko‘rib chiqqan. Vazirlik ma’lumotlariga ko‘ra, bu 2021-yilda ko‘rib chiqilgan arizalar sonidan ikki baravar ko‘p.
“Kanada hukumati bugun biz duch kelayotgan og‘ir ishchi kuchi tanqisligini bartaraf etishga va kelajak uchun kuchli iqtisodiyotni barpo etishga e’tibor qaratgani sababli, bir narsa aniqligicha qolmoqda: immigratsiya bu yechimning asosiy bo‘lagi”, — deyiladi xabarda.
Kanada rasmiylariga ko‘ra, mamlakatda ishchi kuchi o‘sishining deyarli 100 foizi, aholi o‘sishining esa taxminan 75 foizi immigrantlar hissasiga to‘g‘ri keladi. Vazirlikning prognozlariga ko‘ra, 2036-yilga kelib, immigrantlar Kanada aholisining 30 foizini tashkil qiladi, 2011-yilda bu ko‘rsatkich 20,7 foiz edi.
Kanada har yili qabul qiladigan doimiy rezidentlar soni parlamentga taqdim etiladigan immigratsiya darajasining yillik rejasiga asoslanadi. Noyabr oyida taqdim etilgan rejaga ko‘ra, 2023-yilda mamlakat 465 ming muhojirni qabul qilmoqchi, 2025-yilga borib esa bu ko‘rsatkich 500 ming kishiga yetishi kerak.
Izoh (0)