«24.kg» Қирғизистон президенти Садир Жапаровнинг кийим-кечаклари нархини ҳисоблаб чиқди, уларнинг қиймати президентнинг расмий даромадидан бир неча баробар баландроқ бўлиб чиқди.
Аввалроқ Қирғизистон Солиқ хизмати мансабдор шахсларнинг 2021 йил якуни бўйича даромадлари тўғрисидаги декларацияларини эълон қилган эди. Садир Жапаров 2021 йилда даромади 997 803 қирғиз сомини (тахминан 11500 доллар) ташкил қилганини кўрсатган. Бу президентнинг ойлик даромади 83,1 минг қирғиз сомига (тахминан 930 доллар) тенг бўлганини англатади.
Ҳужжатга кўра, унинг тасарруфида қишлоқ хўжалигига мўлжалланган 0,6 гектар ер участкаси ва гараж бор.
Кўчмас мулк ёки транспорт воситаси ҳақида маълумот берилмаган. Шунингдек, давлат раҳбарининг энг яқин қариндошлари даромадлари ва мол-мулки ҳақида ҳам маълумот йўқ.
Айни вақтда эса давлат раҳбари Куланак ГЭС қурилиш жойига кийиб келган куртканинг нархи унинг йиллик даромадидан каттароқ. У 1 миллион 364 минг сом (14 750 доллар) бўлиб, бу Садир Жапаровнинг 15 та ойлик маошига тенг демакдир.
Аввалроқ Жапаров Германиядан давлат бюджетига сотиб олинган Airbus H145 вертолётини синовдан ўтказиш жараёнида кийган курткаси муҳокамага сабаб бўлган эди. У Loro Piana брендининг мўйнали курткасида кўриниш берган, «Vipavenue.ru» сайтида унинг нархи 14 177 евро эканини кўриш мумкин. Бу президентнинг гардеробидаги ягона қимматбаҳо кийим эмас, дейилади хабарда.
Яқинда Олий Евросиё иқтисодий кенгаши якуний мажлисига Қирғизистон раҳбари қизил тагчармли Christian Louboutin француз бренди оёқ кийимида келганди, унинг нархи 86,5 минг сом (1010 доллар) бўлиб, бу ҳам президентнинг ойлик маошидан кўп демакдир.
8 февралда ҳам Қирғизистон президенти пойтахт бозорларидаги тадбиркорлар билан назорат-касса машиналарини жорий этиш юзасидан мулоқот ўтказганда кийган курткаси муҳокамаларга сабаб бўлганди. Ижтимоий тармоқларда президентнинг курткаси Италиянинг Stefano Ricci брендидан бўлиб, унинг нархи 5900 доллар экани ҳақида маълумот тарқалган.
2022 йил августида давлат раҳбарининг Ermenegildo Zegna брендига тегишли кардигани ҳам ижтимоий тармоқларда шов-шувга сабаб бўлганди, унинг нархи 5 минг доллар бўлиб, бу Жапаровнинг оилик маошидан беш баравар кўпдир.
Бундан аввал ҳам Садир Жапаров ва унинг рафиқаси Ойгул Жапарованинг қимматбаҳо чанғи либоси муҳокамаларга сабаб бўлганди. Уларнинг устидаги либослари қимматбаҳо маркали курткаларга жуда ўхшашлиги айтилган.
Тахминларга кўра, президент эгнидаги куртка Lynn брендига тегишли бўлиб, 1099 евро туради. Биринчи хонимнинг устидаги куртка эса Toni Sailer брендиники бўлиб, нархии тахминан 1600 долларни ташкил қилади.
Ўтган йилнинг ўзида Садир Жапаровнинг эгнида қарийб 2 миллион 500 минг сом (29 минг доллардан зиёд)лик кийим-кечакларни кўришган. Бу унинг йиллик даромадидан 2,5 баравар ортиқроқ демакдир.
Изоҳ (0)