Moskva Yaponiyaning asta-sekinlik bilan tinch rivojlanish siyosatidan voz kechishini Rossiya va Osiyo-Tinch okeani mintaqasi xavfsizligi uchun jiddiy chaqiriq deb hisoblaydi. Agar mamlakat shu yo‘lni davom ettirsa, Rossiya xavf oldini olish uchun javob choralarini ko‘rishga majbur bo‘ladi. Bu haqda Rossiya tashqi ishlar vaziri o‘rinbosari Andrey Rudenko “TASS”ga bergan intervyusida ma’lum qildi.
“Yaponiya tomonidan ko‘p o‘n yilliklar davomida e’lon qilib kelingan ‘tinch rivojlanish’ yo‘lidan jadal harbiylashish yo‘nalishiga o‘tish bosh vazir Fumio Kisida ma’muriyati tomonidan tezkorlik bilan amalga oshirilayotganiga e’tibor qaratdik”, — dedi Rudenko.
Moskvani xavotirga solayotgan qadamlar sifatida u Rossiya chegaralari yaqinida mintaqadagi boshqa sheriklar bilan o‘tkazilayotgan harbiy mashqlarni, mudofaa va xavfsizlik sohasida qabul qilinib, “zarbdor potensialni yaratish”ga urg‘u beradigan yangi doktrinalarning qabul qilinishini hamda “mudofaa xarajatlarining misli ko‘rilmagan darajada oshirilishi”ni keltirib o‘tdi.
“Tokioning bunday faolligiga mamlakatimiz va umuman Osiyo-Tinch okeani mintaqasi uchun jiddiy chaqiriq sifatida qarayapmiz. Ogohlantiramiz, bunday amaliyot davom ettirilgan taqdirda, Rossiyaga nisbatan harbiy xavflar oldini olish maqsadida munosib javob choralarini ko‘rishga majbur qolamiz”, — deya xulosa qildi u.
Tokio o‘tgan yil ichida Rossiya chegaralari yaqinida bir necha marotaba manyovrlar o‘tkazdi. Xususan, oktabrda Xokkaydo orolining sharqiy qismidagi Yausubetsu poligonida Yaponiya o‘z-o‘zini mudofaa qilish yerusti kuchlari AQSH Harbiy-dengiz kuchlari bilan HIMARS baravar o‘t ochish reaktiv tizimlari ishtirokida mashqlar bo‘lib o‘tdi. O‘shanda Rossiya TIV Yaponiya tomoniga norozilik bildirgandi.
Ukrainada harbiy operatsiya boshlanishidan avval Rossiya va Yaponiya tinchlik, do‘stlik va ahil qo‘shnichilik haqidagi keng qamrovli shartnoma haqida muzokaralar olib borayotgan edi. 24-fevraldan keyin Kisida Rossiyaning xatti-harakatlarini qoraladi. Yaponiya hukumati Rossiyaga nisbatan sanksiyalarning bir nechta paketini joriy qildi, Rossiya hukumati ham xuddi shunday choralarni qo‘lladi.
Avvalroq 2023-yilda “Katta yettilik” davlatlari (G7) raisi maqomini oladigan Yaponiya Ukraina prezidenti Vladimir Zelenskiyni G7 sammitida onlayn formatda ishtirok etishga taklif qilmoqchi ekani xabar berilgandi.
Izoh (0)