AQSH prezidenti Jo Bayden Janubiy Koreya hukumati bilan qo‘shma yadroviy mashg‘ulotlarni muhokama qilmayotganini aytdi. Avvalroq Janubiy Koreya prezidenti Yun Sok Yol AQSH bilan yadroviy kuchlarni jalb qilgan holda qo‘shma mashg‘ulotlarni o‘tkazish haqida muzokaralar olib borilayotganini aytgan edi.
Janubiy Koreya hukumati bilan qo‘shma mashg‘ulotlar masalasini muhokama qilgan-qilmagani haqidagi savolga javob berayotib, u: “Yo‘q”, — dedi.
Yun Sok Yol Chosun Ilbo gazetasiga bergan intervyusida Seul va Vashington Amerika yadroviy qurollari ishtirokida qo‘shma mashg‘ulotlar o‘tkazish imkoniyatini muhokama qilayotganini aytgandi.
“Yadro qurollari AQSHga tegishli bo‘lsa-da, razvedka ma’lumotlarini almashish, rejalashtirish va mashg‘ulotlar birgalikda amalga oshirilishi kerak”,— dedi u va AQSHning bu tashabbusga ijobiy munosabatda ekanini ta’kidladi. Mashg‘ulotlar Janubiy Koreyaga Shimoliy Koreyadan keladigan yadroviy tahdidga tayyorlanishda yordam berishi kutilmoqda.
Avgust o‘rtalarida Yun Sok Yol KXDRga yadrosizlanish evaziga iqtisodiy ko‘mak taklif qilgandi. Biroq Shimoliy Koreya hukumati bu taklifni rad etdi. Rossiyaning KXDRdagi elchisi AQSH va Janubiy Koreya harbiy mashg‘ulotlari Shimoliy Koreya yadroviy kuchlari safarbar etilishiga olib kelishi mumkinligini taxmin qildi.
31-dekabr kuni KXDR Mehnat partiyasi yalpi majlisida Kim Chen In mamlakat yadroviy arsenalini kuchaytirish zaruriyati oshganini, chunki Janubiy Koreya “shak-shubhasiz dushman”ga aylanganini ma’lum qildi. Uning bayonotiga javoban Janubiy Koreya yadroviy zarba amalga oshirilgan taqdirda, Kim Chen In rejimiga nuqta qo‘yilishi haqida ogohlantirdi.
Izoh (0)