Yaponiya AQSHda ishlab chiqarilgan Tomahawk raketalaridan 500 tacha sotib olmoqda. Bu haqda Washington Post gazetasi amerikalik va yaponiyalik rasmiylarga tayanib yozdi. Tokioning harakatlari Ikkinchi jahon urushi tugaganidan beri eng yirik qurollanish deb ataldi.
Tokio raketalarni milliy xavfsizlik va mudofaa strategiyasini ko‘rib chiqish doirasida sotib olmoqda. Shu bilan birga, mamlakat hukumati mudofaa budjetini sezilarli darajada — YIMning 2 foizigacha oshiradi.
Yuzlab Tomahawk sotib olish bilan Yaponiya Xitoy va Shimoliy Koreyaga harbiy signal yubormoqda, hamda Xitoyning Tayvanga bostirib kirishi ehtimoli jiddiy ekanini bildirmoqda. Agar bu davlatlar Yaponiyaga qarshi tahdidlar bilan cheklanmasa, Tomahawk’ning uchish masofasi raketalarga Xitoy materigi yoki Shimoliy Koreya hududiga yetib borish imkonini beradi, deb qayd etdi nashr.
Yapon elitasi va jamiyati Ukrainada urush boshlanganidan keyin qurollanish qarorida yanada mustahkamlandi. Parvoz masofasi 1600 kilometrgacha bo‘lgan Tomahawk raketalari Rossiyaning Uzoq Sharqiga, mamlakat shimolida o‘rnatilgan raketalar esa Sharqiy Sibirga yetib borishi mumkin.
Tomahawk Yaponiya uchun yakuniy yechim bo‘lmaydi. Tokio 10 yil ichida ilk bor o‘zining “Tip 12” qanotli raketalarini olmoqda.
Bayden ma’muriyati Yaponiyaning qayta qurollanishini qo‘llab-quvvatladi. “Qo‘shma Shtatlar shunchaki bir tomonlama qadamlar qo‘ymasdan, ittifoqchilar va hamkorlarni katta o‘zgarishlarga olib keladigan va mintaqadagi imkoniyatlarimizni oshiradigan yo‘llar bilan kuchaytirishga intilmoqda”, — dedi amerikalik rasmiy The Washington Post gazetasiga. Bungacha AQSH Tomahawk’larni faqat Buyuk Britaniyaga sotgan.
Izoh (0)