Ukraina Qurolli kuchlari bosh qo‘mondoni Valeriy Zalujniy 2022-yil yakunlarini keltirib o‘tdi. Uning ma’lum qilishicha, Ukraina urush boshlanganidan buyon o‘tgan o‘n oy ichida o‘zining Rossiya tomonidan to‘liq ko‘lamli istilo boshlanishidan oldin va keyin bosib olingan hududlari, ya’ni, shu jumladan, Qrim hamda DXR va LXR hududlarining 28 foizini ozod etishga muvaffaq bo‘lgan.
Zalujniy keltirib o‘tgan ma’lumotlarga ko‘ra, so‘nggi oylarda UQK Ukrainaning qariyb 40 ming kvadrat metr hududini ozod qilgan — bu Rossiya 2022-yil 24-fevraldan keyin egallab olgan maydonlarning taxminan 40 foizi demakdir. Ayni paytda quruqlikdagi front chizig‘i qariyb 4 ming kilometrga cho‘zilgan, faol jangovar harakatlar esa 1500 kilometrlik maydonda bo‘lib o‘tmoqda.
Bundan tashqari, bosh qo‘mondon qayd etishicha, UQK urush mobaynida 600 mingdan ortiq tinch aholini jangovar harakatlar zonasidan evakuatsiya qilishga, shuningdek, ikki million tonna gumanitar yuklarni yetkazib berilishi va taqsimlanishini amalga oshirishga muvaffaq bo‘lgan.
Shuningdek, Zalujniyning xabarida aytilishicha, bir yil ichida UQK 1300 gektardan ortiq hududlarni portlovchi predmetlardan tozalagan hamda 41 mingta portlash xavfi bo‘lgan narsalarni yo‘q qilgan.
Yoz oxiri — kuz boshida UKQ hujumga o‘tdi, natijada ular Rossiya tomonidan 24-fevraldan keyin egallab olingan katta-katta hududlarni ozod etishga muvaffaq bo‘ldi. Xususan, sentabr o‘rtalariga kelib, UQK Xarkov viloyatini deyarli to‘liq ozod etdi, noyabrda esa Ukraina harbiylari Xerson shahriga kirdi.
Mavzuga doir:
Izoh (0)