Москва Япониянинг аста-секинлик билан тинч ривожланиш сиёсатидан воз кечишини Россия ва Осиё-Тинч океани минтақаси хавфсизлиги учун жиддий чақириқ деб ҳисоблайди. Агар мамлакат шу йўлни давом эттирса, Россия хавф олдини олиш учун жавоб чораларини кўришга мажбур бўлади. Бу ҳақда Россия ташқи ишлар вазири ўринбосари Андрей Руденко «ТАСС»га берган интервьюсида маълум қилди.
«Япония томонидан кўп ўн йилликлар давомида эълон қилиб келинган ‘тинч ривожланиш’ йўлидан жадал ҳарбийлашиш йўналишига ўтиш бош вазир Фумио Кисида маъмурияти томонидан тезкорлик билан амалга оширилаётганига эътибор қаратдик», — деди Руденко.
Москвани хавотирга солаётган қадамлар сифатида у Россия чегаралари яқинида минтақадаги бошқа шериклар билан ўтказилаётган ҳарбий машқларни, мудофаа ва хавфсизлик соҳасида қабул қилиниб, «зарбдор потенциални яратиш»га урғу берадиган янги доктриналарнинг қабул қилинишини ҳамда «мудофаа харажатларининг мисли кўрилмаган даражада оширилиши»ни келтириб ўтди.
«Токионинг бундай фаоллигига мамлакатимиз ва умуман Осиё-Тинч океани минтақаси учун жиддий чақириқ сифатида қараяпмиз. Огоҳлантирамиз, бундай амалиёт давом эттирилган тақдирда, Россияга нисбатан ҳарбий хавфлар олдини олиш мақсадида муносиб жавоб чораларини кўришга мажбур қоламиз», — дея хулоса қилди у.
Токио ўтган йил ичида Россия чегаралари яқинида бир неча маротаба манёврлар ўтказди. Хусусан, октябрда Хоккайдо оролининг шарқий қисмидаги Яусубецу полигонида Япония ўз-ўзини мудофаа қилиш ерусти кучлари АҚШ Ҳарбий-денгиз кучлари билан HIMARS баравар ўт очиш реактив тизимлари иштирокида машқлар бўлиб ўтди. Ўшанда Россия ТИВ Япония томонига норозилик билдирганди.
Украинада ҳарбий операция бошланишидан аввал Россия ва Япония тинчлик, дўстлик ва аҳил қўшничилик ҳақидаги кенг қамровли шартнома ҳақида музокаралар олиб бораётган эди. 24 февралдан кейин Кисида Россиянинг хатти-ҳаракатларини қоралади. Япония ҳукумати Россияга нисбатан санкцияларнинг бир нечта пакетини жорий қилди, Россия ҳукумати ҳам худди шундай чораларни қўллади.
Аввалроқ 2023 йилда «Катта еттилик» давлатлари (G7) раиси мақомини оладиган Япония Украина президенти Владимир Зеленскийни G7 саммитида онлайн форматда иштирок этишга таклиф қилмоқчи экани хабар берилганди.
Изоҳ (0)