Qirg‘iziston prezidenti Sadir Japarov “Kabar” agentligiga bergan intervyusida rus tilining mamlakat bo‘ylab rivojlanishi uchun katta qadamlar qo‘yilayotganini aytdi.
Japarovning so‘zlariga ko‘ra, 2023-yilda Qirg‘izistonda Rossiya mablag‘lari hisobiga 9 ta rus tilida ta’lim beruvchi maktablar quriladi. Prezident davlat organlariga hujjatlarni qirg‘iz tilida yuritish bo‘yicha qo‘yiladigan talablarga ham izoh bergan.
“Sovet Ittifoqi parchalanganidan keyin, ayniqsa, viloyatlarda rus tili o‘qituvchilari soni sezilarli darajada kamaydi. Hujjatlarni rus tilida yuritishda xodimlar xatolarga yo‘l qo‘yishi ma’lum bo‘ldi. Shuning uchun men savodli bo‘lish maqsadida hujjatlarni qirg‘iz tilida olib borishni va orqa tomoniga ruscha variantini ilova qilishni taklif qildim.
Chalkashmaslik uchun asosiy hujjat qirg‘iz tilida bo‘lishi, ruscha nusxasi esa unga ilova qilinishi kerak. Hujjatlarni hozirgacha qirg‘iz tilidan rus tiliga tarjima qilamiz. Rus tili Konstitutsiyamizda rasmiy til sifatida belgilab qo‘yilgani hammaga ma’lum”, — deydi Qirg‘iziston prezidenti.
U muhojirlarni o‘z vatanlarida ish bilan ta’minlash uchun hokimiyat tomonidan sa’y-harakatlar qilinayotganini ham aytdi.
“Tan olish kerakki, muhojirlarimizning aksariyati Rossiyada. Shuning uchun ular rus tilini yaxshi bilishi kerak”, — deydi Qirg‘iziston rahbari.
“2022-yil Rossiyaga amaliy tashrifim chog‘ida men Vladimir Putindan bu yerda ta’lim rus tilida olib boriladigan to‘qqizta maktab qurilishiga yordam berishni so‘ragandim. Xudo xohlasa, 2023-yili mamlakatimizning barcha hududlarida shunday maktablar quriladi. Agar bizda rus tilidagi yaxshi maktablar, sifatli ta’lim bo‘lsa, 5-10 yildan keyin rus tili yana rivojlanadi. Umuman olganda, MDH davlatlarida, YII doirasida rus tilini bilmasdan turib biznes yuritish mumkin emas. Qolaversa, rus tili BMT doirasida keng qo‘llaniladi”, — deydi u.
Prezident rasmiylar maktablarda ingliz tili yaxshi o‘qitilishini ta’minlashga harakat qilayotgani, biroq ularni moliyalashtirishda muammo bo‘lishi mumkinligini aytdi.
“3 000 dan ortiq maktab malakali ingliz tili o‘qituvchilarini jalb qilishi kerak. Ularga tegishli maosh to‘lanishi zarur. Bu masala o‘rganilmoqda. Umuman aytganda, mening gaplarimdan ayb yoki siyosat izlashning hojati yo‘q. Aksincha, o‘quvchilarimiz nafaqat rus tilini, balki boshqa tillarni ham bilishsa, zo‘r bo‘ladi. Qancha til bilishsa, shuncha bilim oladi, erkin sayohat qilib, o‘qishi mumkin bo‘ladi”, — deya qo‘shimcha qildi Sadir Japarov.
Mavzuga doir:
- Qirg‘iziston prezidenti amaldorlarni rus tilida hujjat yuritayotgani uchun tanqid qildi
- To‘qayev: “Rus tilining MDHdagi roli shubha ostiga olinishi mumkin emas”
- Video: Qirg‘iziston parlamenti spikeri ekologiya vaziriga rus tilida ma’ruza qilishga ruxsat bermadi
- Rossiya Davlat dumasida Qirg‘izistondagi tumanlarning rus tilidagi nomini o‘zgartirish oqibati aytildi
Izoh (0)