Қирғизистон президенти Садир Жапаров «Кабар» агентлигига берган интервьюсида рус тилининг мамлакат бўйлаб ривожланиши учун катта қадамлар қўйилаётганини айтди.
Жапаровнинг сўзларига кўра, 2023 йилда Қирғизистонда Россия маблағлари ҳисобига 9 та рус тилида таълим берувчи мактаблар қурилади. Президент давлат органларига ҳужжатларни қирғиз тилида юритиш бўйича қўйиладиган талабларга ҳам изоҳ берган.
«Совет Иттифоқи парчаланганидан кейин, айниқса, вилоятларда рус тили ўқитувчилари сони сезиларли даражада камайди. Ҳужжатларни рус тилида юритишда ходимлар хатоларга йўл қўйиши маълум бўлди. Шунинг учун мен саводли бўлиш мақсадида ҳужжатларни қирғиз тилида олиб боришни ва орқа томонига русча вариантини илова қилишни таклиф қилдим.
Чалкашмаслик учун асосий ҳужжат қирғиз тилида бўлиши, русча нусхаси эса унга илова қилиниши керак. Ҳужжатларни ҳозиргача қирғиз тилидан рус тилига таржима қиламиз. Рус тили Конституциямизда расмий тил сифатида белгилаб қўйилгани ҳаммага маълум», — дейди Қирғизистон президенти.
У муҳожирларни ўз ватанларида иш билан таъминлаш учун ҳокимият томонидан саъй-ҳаракатлар қилинаётганини ҳам айтди.
«Тан олиш керакки, муҳожирларимизнинг аксарияти Россияда. Шунинг учун улар рус тилини яхши билиши керак», — дейди Қирғизистон раҳбари.
«2022 йил Россияга амалий ташрифим чоғида мен Владимир Путиндан бу ерда таълим рус тилида олиб бориладиган тўққизта мактаб қурилишига ёрдам беришни сўрагандим. Худо хоҳласа, 2023 йили мамлакатимизнинг барча ҳудудларида шундай мактаблар қурилади. Агар бизда рус тилидаги яхши мактаблар, сифатли таълим бўлса, 5-10 йилдан кейин рус тили яна ривожланади. Умуман олганда, МДҲ давлатларида, ЕИI доирасида рус тилини билмасдан туриб бизнес юритиш мумкин эмас. Қолаверса, рус тили БМТ доирасида кенг қўлланилади», — дейди у.
Президент расмийлар мактабларда инглиз тили яхши ўқитилишини таъминлашга ҳаракат қилаётгани, бироқ уларни молиялаштиришда муаммо бўлиши мумкинлигини айтди.
«3 000 дан ортиқ мактаб малакали инглиз тили ўқитувчиларини жалб қилиши керак. Уларга тегишли маош тўланиши зарур. Бу масала ўрганилмоқда. Умуман айтганда, менинг гапларимдан айб ёки сиёсат излашнинг ҳожати йўқ. Аксинча, ўқувчиларимиз нафақат рус тилини, балки бошқа тилларни ҳам билишса, зўр бўлади. Қанча тил билишса, шунча билим олади, эркин саёҳат қилиб, ўқиши мумкин бўлади», — дея қўшимча қилди Садир Жапаров.
Мавзуга доир:
- Қирғизистон президенти амалдорларни рус тилида ҳужжат юритаётгани учун танқид қилди
- Тўқаев: «Рус тилининг МДҲдаги роли шубҳа остига олиниши мумкин эмас»
- Видео: Қирғизистон парламенти спикери экология вазирига рус тилида маъруза қилишга рухсат бермади
- Россия Давлат думасида Қирғизистондаги туманларнинг рус тилидаги номини ўзгартириш оқибати айтилди
Изоҳ (0)