“Qasddan provokatsiya”. Isroil xavfsizlik vaziri Al-Aqso masjidiga bordi (video)

Isroil milliy xavfsizlik vaziri Itamar Ben-Gvir Sharqiy Quddusdagi Al-Aqso masjidiga bordi, bu AQSH, Falastin va bir qancha arab davlatlari, jumladan, Isroil bilan tinchlik shartnomasini imzolagan davlatlar tomonidan qoralandi. Bu haqda Al Jazeera xabar berdi.

“Quddusdagi muqaddas joyning status-kvosini xavf ostiga qo‘yadigan har qanday bir tomonlama harakatni qabul qilib bo‘lmaydi. AQSH Quddusdagi muqaddas joylarga nisbatan status-kvoni saqlab qolish tarafdori”, — dedi Oq uy matbuot kotibi va Isroil bosh vaziri Benyamin Netanyaxuni muqaddas joylarning status-kvosiga sodiqligini saqlab qolishga chaqirdi.

Netanyaxu holat yuzasidan bayonot berib, u “Ma’bad tog‘idagi (Al-Aqso majmuasidagi) status-kvoni o‘zgartirishlarsiz qat’iy saqlashga sodiqligini” da’vo qildi.

“So‘nggi yillarda status-kvo ostida vazirlar Ma’bad tog‘iga chiqdi, shuning uchun status-kvoga o‘zgartirish kiritilgani haqidagi da’vo asossiz”, — dedi u.

Qamaldagi G‘azo sektorini boshqarayotgan Falastin fraksiyasi bunday harakat “qizil chiziq”ni kesib o‘tishi haqida ogohlantirganidan so‘ng, Ben-Gvir Isroil hukumati “HAMAS tahdidlariga ko‘nmasligini” aytdi.

U uzoq vaqtdan beri yahudiylarning muqaddas joyga kirishini kengaytirishga chaqirgan. Falastinliklar buni Isroil majmuani to‘liq nazorat qilmoqchiligi bilan izohlaydi.

Ben-Gvir Al-Aqsoga tashrifidan so‘ng Twitter’da “majmua hamma uchun ochiq, agar HAMAS menga tahdid qilsa, meni qo‘rqitaman deb o‘ylasa, zamon o‘zgarganini tushunishi kerak” deb yozdi.

Falastin Tashqi ishlar vazirligi “ekstremist vazir Ben-Gvir tomonidan Al-Aqso masjidiga bostirib kirishni keskin qoraladi va buni misli ko‘rilmagan provokatsiya, mojaroning xavfli avj olishi deb baholadi”.

Isroil bilan tinchlik shartnomasiga ega bo‘lgan Iordaniya, Misr va Birlashgan Arab Amirliklari Ben-Gvirning Al-Aqsonga “bosqin” qilganini qoraladi.

Netanyaxu tinchlik bitimi tuzmoqchi bo‘lgan Saudiya Arabistoni ham Ben-Gvirning harakatini tanqid qildi. Yaqinda Isroil bilan uzoq davom etgan diplomatik kelishmovchilikka barham bergan Turkiya bu tashrifni ham “provokatsiya” deb atadi.

Isroil muxolifati yetakchisi va sobiq bosh vazir Yair Lapid Al-Aqsoga Ben-Gvirning kirishi zo‘ravonlikka olib kelishidan ogohlantirgan va buni “hayotni xavf ostiga qo‘yadigan qasddan provokatsiya” deb atagan.