Yevroittifoq hukumati Xitoyga COVID-19 ning yangi to‘lqiniga qarshi kurashda yordam sifatida virusga qarshi bepul vakinalarni yetkazib berishni taklif qildi. Bu haqda Financial Times Yevrokomissiya vakillariga tayanib xabar berdi.
Nashr ma’lumotlariga ko‘ra, sog‘liqni saqlash masalalari bo‘yicha yevrokomissar Stella Kiriakides koronavirusning dunyo bo‘ylab qaytadan avj olishi ehtimoliga “yevropacha javob”ni ishlab chiqmoqchi.
“Kiriakides xitoylik hamkasblariga murojaat qilib, birdamligini izhor qildi va ko‘mak taklif qildi, shu jumladan, jamoatchilik sog‘lig‘ini saqlash sohasida ekspertlar yordamini, shuningdek, Yevroittifoq vaksinalarini xayriya qilishni taklif etdi”, — dedi gazetaga Yevrokomissiyadagi manbalaridan biri.
25-dekabr kuni koronavirus bilan kasallanish darajasi keskin oshishi tufayli, Xitoy virus haqidagi kundalik ma’lumotlarni e’lon qilishni to‘xtatdi. Kasallanish holatlari Xitoy hukumatining koronavirus cheklovlariga qarshi noroziliklar fonida cheklov choralarini yumshatish haqidagi qaroridan keyin ko‘paydi. Avstraliya va Kanada Xitoydan kelgan sayyohlar uchun koronavirusga qarshi testni joriy qildi.
Izoh (0)