Rossiyalik mashhur xonanda Valeriy Meladze Dubaydagi yangi yil korporativ kechasidagi nutqida “Qahramonlarga shon-sharaf” deya, muxlisining murojaatiga javob qaytardi. Buning ortidan Rossiya rasmiylari uni fuqarolikdan mahrum qilib, “xorijiy agent” deb e’lon qilishga chaqirdi.
Ijtimoiy tarmoqlarda tarqalgan videoda Dubaydagi korporativ kechada Meladzening muxlisi unga “Ukrainaga shon-sharaf!” deya murojaat qilgan. Bunga javoban Meladze mikrofonni og‘zidan olib, “Qahramonlarga shon-sharaf” deya javob qaytargan va ko‘zini qisib qo‘ygan. Xonanda korporativ kechasi “siyosatdan tashqarida” ekanini aytib o‘tgan.
Rossiya rasmiylari esa Meladzening Ukrainaning qo‘llab-quvvatlab aytgan shiorini tanqid qilib, uni Rossiya fuqaroligidan mahrum qilishga va xorijiy agent deb e’lon qilishga chaqirgan.
Meladzening o‘zi esa 3-yanvar kuni Instagram sahifasida tanqidlarga munosabat bildirgan.
“Odamlar, meni eshitishingizni va so‘zlarimni tushunishingizni xohlayman. Mana 10 oydirki, men ham boshqa odamlar kabi qayg‘u hissi bilan yashayapman. Men juda yaxshi ko‘rgan xalqlar to‘qnashuvda bo‘lib, odamlar halok bo‘lmoqda. Hech kimdan nafratlanishni xohlamayman va kimnidir rozi qilishga ham harakat qilmayman. Men faqat qarama-qarshilik to‘xtab, yaqin xalqlar o‘rtasida totuvlik o‘rnatilishini orzu qilaman. Buning uchun esa bor kuchimni berishga tayyorman”, — deydi Meladze.
Valeriy Meladze avval ham Ukrainadagi urushni qoralagan edi. Shundan so‘ng xonandaning Rossiyadagi konsertlari bekor qilingan.
Izoh (0)