To‘kin dasturxon, yaqinlar diydori va Yangi yil bezaklari... Har bir oila yilning so‘nggi kunini ko‘taringki kayfiyatda kutib olishga harakat qiladi. Ammo, bu kun ham kutilmagan voqealar bilan esda qolishi mumkin. O‘zbek san’at vakillari ham Yangi yil oqshomida ko‘plab sarguzashtlarni boshlaridan kechirishgan.
Sitora Farmonova
— Aynan Yangi yil oqshomidagi ukam sabab qo‘limni eshik qisib qolgan. Avvaliga og‘riq o‘tib ketar deb o‘ylaganman. Ammo barmoqlarim soat sayin shishib, og‘riq ortavergan. Shundan keyin Yangi yilga bir soat qolganida kasalxonaga borishimizga to‘g‘ri kelgan. “Shu kuni tinch o‘tirmadinglarmi?” deb shifokorlar barmog‘im singanini aytishgandi. Xullas, gips qildirib uyga qaytgunimizga qadar Yangi yil kirib bo‘lgandi. Bu hayotimdagi eng og‘riqli va sarguzashtga boy Yangi yil bayrami bo‘lgan.
Davron Ergashev
— Bir yil bolalarni xursand qilay deb Qorboboni buyurtma qilganman. Yangi yil kuni Qorboboning xizmat haqqi anchayin yuqori bo‘lar ekan. “Mayli pul ketsa ham bolalar quvonsin”, deb Qorboboni chaqirtirganman. O‘sha paytda yangi inomarka mashinani xarid qilgandim. Bir payt “taraq” etgan ovoz chiqdi. Hayron bo‘lib ko‘chaga chiqsam, Qorbobo mashinamning ortidan kelib urgan ekan. Bolalar uni ko‘rib xursand, men esa mashinamni ko‘rib kayfiyatim tushgan. Aksiga olib Qorboboga og‘ir ham gapirolmaganman. Xullas, o‘sha yili Qorboboning kelishi menga juda qimmatga tushgan.
Yorqinxo‘ja Umarov
— Sakkiz yil ishdan ertaroq kelib, uydagilar bilan Yangi yilni kutib olaman desam hech kim uyda yo‘q. Ular menga aytmay. Mehmonga ketishgan ekan. Aksiga olib, ortimga ham qaytib ketolmay qolganman. Chunki 10 daqiqadan so‘ng bayram kirishi kerak edi. Xullas uyga kirib, mandarinni yeb Yangi yilni kutib olganman. Hozircha hayotimdagi eng unutilmas Yangi yil shu bo‘lgan.
Elmurod Haqnazarov
— Uch-to‘rt yil oldin bayram kuni bolalarni quvontiray deb salyut sotib olganman. Soat o‘n ikkiga bong urganida oilaviy ko‘chaga chiqqanmiz. Salyutni otib uyga kirsak, molxonadagi ikkita qo‘yni “urib” ketishibdi. Mahalla noziri kelgan, xullas yil bayonnoma tuzish bilan boshlangan (kulib).
Shohida Uzoqova
— Hayotimdagi unutilmas Yangi yilni ancha yil avval onam, opalarim davrasida kutib olganman. Xontaxta atrofiga ko‘rpachalar solib, oddiygina dasturxon bezatib samimiy suhbat qurgandik. O‘sha kundan bittagina rasm esdalik bo‘lib qolgan. Yaqinlarimni sog‘insam o‘sha rasmga qarab qo‘yaman. Hozir katta stol-stulni turli noz-ne’matlar bilan yasatib. Bayramni kutib olamiz. Afsuski, unga yaqinlarim diydori va samimiy suhbati yetishmaydi.
Shohruxxon
— Hayotimdagi eng unutilmas Yangi yil o‘tgan yili sodir bo‘ldi. Turkiyadagi konsertim sabab, oilamni ham o‘zim bilan olib ketdim. Konsert 31-dekabrda bo‘ldi, uni o‘tkazib oilam bilan mashinaga o‘tirib ketayotgandik. Aksiga olib, tirband yo‘lda qolib ketdik. Va oilam bilan bayramni mashinada kutib olishimizga to‘g‘ri keldi.
Dilshod Nazarov
— Shu kungacha nechta Yangi yil bayramini nishonlagan bo‘lsam, hammasi o‘ziga xos o‘tgan. Chunki bu kun oilamizda qo‘shaloq bayram. Onam ham aynan Yangi yil oqshomida dunyoga kelgan. Ba’zan Yangi yil yo‘q, degan gaplarni eshitib qolsam biz bayramni emas. onamning shukrona kunlarini nishonlayapmiz, deb kulib qo‘yaman.
Ozoda Nursaidova
— Hayotimdagi eng unutilmas Yangi yilni 2002-yili kutib olganman. O‘shanda reys qoldirilgani uchun aeroportda qolib ketganmiz. Hammaning kayfiyati yomon bo‘lsa-da, terminalda o‘zimizcha bayram tashkillashtirganmiz (kulib). San’atkorlarning hayotida bunday unutilmas bayramlar ko‘p bo‘ladi. Chunki ular hamisha xizmatda. Bayram kuni bemalol dam olib o‘tirganimni eslolmayman. Hamisha bir tadbirdan, ikkinchisiga shoshamiz. Ba’zan Yangi yilni yo‘lda kutib olgan paytlarimiz ham bo‘ladi.
Hamdam Sobirov
— Ilgari bayram qadrini unchalik tushunmasdim. Hozir eng yaxshi bayram ota-onam, singillarim davrasida o‘tganini yanada yaxshi his qilyapman.
Ozod Xurramov
— Nazarimda hayotimdagi unutilmas Yangi yil bu yil sodir bo‘ladi. Chunki bu yil Yangi yilning vatanida qarshi olishni rejalashtiryapman. Bundan tashqari, bu yil Ozoda Nursaidova bilan kuylagan duetimiz “Mavsum xitlari”da g‘oliblikni qo‘lga kiritdi. Shuning uchun Yangi yilni yanada, ko‘taringki ruhda kutib olsam kerak.
Doston Ergashev
— Bayram bilan bog‘liq unutilmas voqealar juda ko‘p bo‘lgan. Masalan. Bir yili bayramni tirbandlikda qolgan mashinam ichida kutib olganman. Shukrki, 3 yildan buyon bayramni oila davrasida nishonlash nasib etyapti.
Ulug‘bek Rahmatullayev
— Bayramni hech qachon yomon xotiralar bilan eslamaslik kerak. Quvonchli kundan hamisha xalq xizmatida ekanligimdan xursandman. Ammo bir yil charchab, uxlab qolganman. Ertalab uyg‘onsam, Yangi yil allaqachon kirib bo‘lgan ekan.
Izoh (0)