Yakunlanayotgan yil insonlarda turli xil xotiralarni qoldirdi, 2022-yilda kimdir orzusiga erishdi, kimdir esa baxt qasriga qadam qo‘ydi. O‘zbek shou-biznesining ayrim vakillari ham aynan shu yilda o‘z baxtini topib, turmush qurdi. Quyida shu haqda ma’lumot beriladi.
Faridam
Sardor Rahimxonning klipi orqali tanilib, keyinchalik o‘zi ham xonandalikka qadam qo‘ygan Faridam 2022-yilning 7-yanvar sanasida turmushga chiqdi. Sobiq xonanda ancha paytdan beri Turkiyaning Istanbul shahrida yashab kelayotgan edi. U turkiyalik xonanda Rafet El Roman bilan ham duet kuylagan.
Jahongir Xo‘jayev va Asal Abdullayeva
O‘zbek shou-biznesida o‘z o‘rniga ega bo‘lgan juftlik Jahongir Xo‘jayev va Asal Abdullayevaning nikoh oqshomi 10-mart kuni poytaxtdagi “Yakkasaroy” to‘yxonasida bo‘lib o‘tdi. To‘yda o‘zbek shou-biznesining eng taniqli vakillari: aktyor, aktrisa, xonandalar hamda vaynerlar ishtirok etdi.
Kelin-kuyovni to‘yxonada an’anaviy tarzda O‘zbekiston xalq artisti Farrux Zokirov “Kelibdi” qo‘shig‘i bilan qarshi oldi. Undan keyin esa mehmonlarni Yorqinxo‘ja Umarov, Ulug‘bek Rahmatullayev, Alisher Fayz va boshqa taniqli xonandalar sho‘x taronalari bilan xushnud etdi.
Jahongir Xo‘jayev to‘yida otasiga mashina kalitini topshirdi, onasi va qaynonasiga esa Malika Ravshanovaning “Bu mening onam” qo‘shig‘i sadolari ostida guldasta taqdim etdi.
Aziza Nizomova
Aktrisa, xonanda Aziza Nizomova 19-mart kuni sevgan yigiti bilan turmush qurdi. Uning to‘yi poytaxtdagi restoranlarning birida bo‘lib o‘tdi. Aziza Nizomova o‘z to‘yida qo‘shiq kuyladi. To‘yda o‘zbek shou-biznesining ko‘plab taniqli vakillari mehmon bo‘ldi.
Parizoda Usmonova
Instabloger, tiktoker Parizoda Usmonova 2022-yilning 11-may kuni turmush qurdi. Uning to‘yida ham o‘zbek shou-biznesining taniqli vakillari, blogerlar, vaynerlar ishtirok etdi.
Kaniza
Xonanda Kaniza 25-may kuni 7 yillik sevgilisi bilan turmush qurganini ma’lum qildi. “Biz bir-birimizni 7 yil sinadik. Hatto ayro yo‘llardan ketdik. Men hurmat qiladigan erkak o‘ta rashkchi va san’atni qabul qilolmaydigan bo‘lishi kerak edi. Shunday insonni sevdim. Faqat birga bo‘lishimiz uchun yillar kerak bo‘ldi. Vanihoyat rashk, qaysarlik, har xil shartlardan ko‘ra sevgimiz kuchlilik qildi. Alhamdulillah”, — deb yozadi xonanda Instagram sahifasida.
Ma’rifat Ortiqova
Film va seriallardagi ma’suma ayol obrazi bilan elga tanilgan aktrisa Ma’rifat Ortiqova 2-iyul kuni, 39 yoshida turmushga chiqdi. Uning to‘yida hamkasblari va yaqinlari ishtirok etdi.
Baby Mohi
Instabloger, kover taronalar ijrochisi 22-iyun kuni Jasur Hurriyatov bilan turmush qurdi. Baby Mohi turmush o‘rtog‘i bilan 2019-yili tanishgan va to‘ydan avval biznes hamkorlikni yo‘lga qo‘yishgan. Kelin-kuyovlar brend liboslar savdosi bilan ham shug‘ullanishadi.
Izzat Shukurov
Xonanda, aktyor Tojivoy Shukurovning o‘g‘li Izzat Shukurov 27-iyun kuni uylandi. Uning to‘yida o‘zbek shou-biznesining ko‘plab taniqli vakillari ishtirok etdi. Xonanda Izzat Shukurov ham o‘z to‘yida qo‘shiq kuyladi.
Muzaffar Qurbonov
Xonanda Abdulla Qurbonovning o‘g‘li Muzaffar Qurbonov 2-sentabr kuni turmush qurdi. Uning to‘yida o‘zbek shou-biznesining taniqli vakillari ishtirok etdi. Abdulla Qurbonov to‘yga tashrif buyurgan ayrim hamkasblari ustidan dollar sochdi.
Java Rasulov
Instabloger Javohir Rasulov 7-sentabr kuni hamkasbi Asal Yoqubova bilan oila qurdi. Uning to‘yida mashhur instablogerlar, vaynerlar va xonandalar mehmon bo‘ldi.
Javlonbek Olimov
Xonanda Avazbek Olimovning o‘g‘li Javlonbek Olimov 2022-yilning 23-oktabr kuni uylandi. Uning to‘yida Farruh Zokirov, Ozodbek Nazarbekov, Ali Otajonov va ko‘plab mashhurlar ishtirok etib ijodidagi taronalarni ijro etdi.
Ruxshona
Birinchi turmush o‘rtog‘i prodyuser, klipmeyker Sanjar Matkarimov bilan ajrashgan xonanda Ruxshona 3-sentabr kuni ikkinchi marta turmush qurayotganini ma’lum qildi. Keyinchalik xonanda: “Turmush o‘rtog‘imning millati o‘zbek, Turkiyada yashaydi. Turmushga chiqdim, to‘y qilmadik, chunki bunday istak o‘zimda bo‘lmadi. Bir marta to‘yim bo‘ldi, yetadi, boshqa kelin ko‘ylak kiyish niyatim yo‘q, dedim”, — deb izoh berdi.
Zara Shirinova
Teleboshlovchi Zara Shirinova 25-oktabr kuni sevgan yigiti bilan turmush qurdi, biroq kuyov to‘yda ishtirok etmadi. Zara Shirinova keyinroq bu holatga izoh berib, bo‘lajak turmush o‘rtog‘i ish bilan bog‘liq vaziyat tufayli to‘yda ishtirok etmaganini aytdi.
Timur Kubayev
Aktrisa Dilnoza Kubayevaning ukasi Timur Kubayev 2022-yilning 25-noyabr sanasida oila qurdi. Uning to‘yida mashhur aktrisa va aktyorlar ishtirok etdi. Aktyorning to‘yi poytaxtdagi restoranlarning birida bo‘lib o‘tdi.
Farhod Mahmudov
“Baron” filmidagi roli bilan muxlislarga yaxshi tanish bo‘lgan aktyor Farhod Mahmudov 30-noyabr kuni Kamilla ismli qiz bilan oila qurdi.
Aktyor Farhod Mahmudovning to‘yida o‘zbek san’atining eng taniqli namoyondalari mehmon bo‘ldi.
Bunyod Rahmatullayev
“Ilhaq”, “Sehrli qalpoqcha”, “Yig‘lamagin” filmidagi rollari bilan tomoshabinlar qalbidan joy olgan aktyor Bunyod Rahmatullayev ham 30-noyabr kuni uylandi. Uning to‘yi Toshkentdagi restoranlarning birida bo‘lib o‘tdi.
Jasur Umirov
Xonanda Jasur Umirov 3-dekabr kuni Go‘zal ismli qiz bilan oila qurdi. Tantanaga o‘zbek san’atining ko‘plab taniqli vakillari tashrif buyurdi. Uning to‘yi ham poytaxtdagi hashamatli restoranlarning birida bo‘lib o‘tdi.
“VIA Marakand”, Hosila Rahimova, Imron, Ozoda Nursaidova, Mahmud Namozov, Bunyodbek Saidov, Mavluda Asalxo‘jayeva, Asilbek Amanulloh, Vohidjon Isoqov, Doston Ergashev va boshqa ko‘plab xonandalar nikoh oqshomida qo‘shiq kuylab, kelin-kuyovga baxt tiladi.
Kelin-kuyov Shohjahon Jo‘rayevning “Bitta bo‘lsin” qo‘shig‘i sadolari ostida ilk oilaviy raqsini ijro etdi.
Shahram G‘iyosov
Boks bo‘yicha Rio olimpiadasi kumush medali sohibi, jahon chempioni Shahram G‘iyosovning Buxoro shahridagi to‘yi 6-dekabr kuni bo‘lib o‘tdi. Nikoh oqshomida taniqli sportchilar va o‘zbek shou-biznesining ko‘plab vakillari ishtirok etdi.
Shuningdek, Shahram G‘iyosov 12-dekabr kuni Toshkent shahrida ham to‘y o‘tkazdi. Bu to‘yda ham mashhur xonandalar ishtirok etib, o‘z ijodidagi taronalarni ijro etdi.
Intizor Tojiboyeva
Ustazoda san’atkor, qiziqchi Hojiboy Tojiboyevning qizi Intizor Tojiboyeva 18-dekabr kuni oila qurdi. Uning to‘yida o‘zbek shou-biznesining taniqli vakillari, qiziqchilar, xonandalar ishtirok etdi.
Mavzuga doir:
- 2021-yilda oila qurgan o‘zbek shou-biznesi vakillari (foto).
- Instagram: Ortiq Sultonov o‘g‘lini uylantirdi, Intizor Tojiboyeva turmushga chiqdi, Yulduz Usmonova Umra safaridan qaytdi.
- Instagram: Zara Shirinova turmushga chiqdi, Muqaddas Sa’dullayevaning farzandi bilan bog‘liq ko‘ngilsiz holat, muxlisasiga kiyimini sovg‘a qilgan Yulduz Usmonova.
- Instagram: 36 yoshni qarshi olgan Munisa Rizayeva, Umra safaridagi Shahlo Zoirova, Ruxshona turmushga chiqdi.
- Tiktoker hamda cover qo’shiqlar ijrochisi Baby Mohi turmushga chiqdi ( foto, video).
Izoh (0)