Тўкин дастурхон, яқинлар дийдори ва Янги йил безаклари... Ҳар бир оила йилнинг сўнгги кунини кўтарингки кайфиятда кутиб олишга ҳаракат қилади. Аммо, бу кун ҳам кутилмаган воқеалар билан эсда қолиши мумкин. Ўзбек санъат вакиллари ҳам Янги йил оқшомида кўплаб саргузаштларни бошларидан кечиришган.
Ситора Фармонова
— Айнан Янги йил оқшомидаги укам сабаб қўлимни эшик қисиб қолган. Аввалига оғриқ ўтиб кетар деб ўйлаганман. Аммо бармоқларим соат сайин шишиб, оғриқ ортаверган. Шундан кейин Янги йилга бир соат қолганида касалхонага боришимизга тўғри келган. «Шу куни тинч ўтирмадингларми?» деб шифокорлар бармоғим синганини айтишганди. Хуллас, гипс қилдириб уйга қайтгунимизга қадар Янги йил кириб бўлганди. Бу ҳаётимдаги энг оғриқли ва саргузаштга бой Янги йил байрами бўлган.
Даврон Эргашев
— Бир йил болаларни хурсанд қилай деб Қорбобони буюртма қилганман. Янги йил куни Қорбобонинг хизмат ҳаққи анчайин юқори бўлар экан. «Майли пул кетса ҳам болалар қувонсин», деб Қорбобони чақиртирганман. Ўша пайтда янги иномарка машинани харид қилгандим. Бир пайт «тарақ» этган овоз чиқди. Ҳайрон бўлиб кўчага чиқсам, Қорбобо машинамнинг ортидан келиб урган экан. Болалар уни кўриб хурсанд, мен эса машинамни кўриб кайфиятим тушган. Аксига олиб Қорбобога оғир ҳам гапиролмаганман. Хуллас, ўша йили Қорбобонинг келиши менга жуда қимматга тушган.
Ёрқинхўжа Умаров
— Саккиз йил ишдан эртароқ келиб, уйдагилар билан Янги йилни кутиб оламан десам ҳеч ким уйда йўқ. Улар менга айтмай. Меҳмонга кетишган экан. Аксига олиб, ортимга ҳам қайтиб кетолмай қолганман. Чунки 10 дақиқадан сўнг байрам кириши керак эди. Хуллас уйга кириб, мандаринни еб Янги йилни кутиб олганман. Ҳозирча ҳаётимдаги энг унутилмас Янги йил шу бўлган.
Элмурод Ҳақназаров
— Уч-тўрт йил олдин байрам куни болаларни қувонтирай деб салют сотиб олганман. Соат ўн иккига бонг урганида оилавий кўчага чиққанмиз. Салютни отиб уйга кирсак, молхонадаги иккита қўйни «уриб» кетишибди. Маҳалла нозири келган, хуллас йил баённома тузиш билан бошланган (кулиб).
Шоҳида Узоқова
— Ҳаётимдаги унутилмас Янги йилни анча йил аввал онам, опаларим даврасида кутиб олганман. Хонтахта атрофига кўрпачалар солиб, оддийгина дастурхон безатиб самимий суҳбат қургандик. Ўша кундан биттагина расм эсдалик бўлиб қолган. Яқинларимни соғинсам ўша расмга қараб қўяман. Ҳозир катта стол-стулни турли ноз-неъматлар билан ясатиб. Байрамни кутиб оламиз. Афсуски, унга яқинларим дийдори ва самимий суҳбати етишмайди.
Шоҳруххон
— Ҳаётимдаги энг унутилмас Янги йил ўтган йили содир бўлди. Туркиядаги концертим сабаб, оиламни ҳам ўзим билан олиб кетдим. Концерт 31 декабрда бўлди, уни ўтказиб оилам билан машинага ўтириб кетаётгандик. Аксига олиб, тирбанд йўлда қолиб кетдик. Ва оилам билан байрамни машинада кутиб олишимизга тўғри келди.
Дилшод Назаров
— Шу кунгача нечта Янги йил байрамини нишонлаган бўлсам, ҳаммаси ўзига хос ўтган. Чунки бу кун оиламизда қўшалоқ байрам. Онам ҳам айнан Янги йил оқшомида дунёга келган. Баъзан Янги йил йўқ, деган гапларни эшитиб қолсам биз байрамни эмас. онамнинг шукрона кунларини нишонлаяпмиз, деб кулиб қўяман.
Озода Нурсаидова
— Ҳаётимдаги энг унутилмас Янги йилни 2002 йили кутиб олганман. Ўшанда рейс қолдирилгани учун аэропортда қолиб кетганмиз. Ҳамманинг кайфияти ёмон бўлса-да, терминалда ўзимизча байрам ташкиллаштирганмиз (кулиб). Санъаткорларнинг ҳаётида бундай унутилмас байрамлар кўп бўлади. Чунки улар ҳамиша хизматда. Байрам куни бемалол дам олиб ўтирганимни эслолмайман. Ҳамиша бир тадбирдан, иккинчисига шошамиз. Баъзан Янги йилни йўлда кутиб олган пайтларимиз ҳам бўлади.
Ҳамдам Собиров
— Илгари байрам қадрини унчалик тушунмасдим. Ҳозир энг яхши байрам ота-онам, сингилларим даврасида ўтганини янада яхши ҳис қиляпман.
Озод Хуррамов
— Назаримда ҳаётимдаги унутилмас Янги йил бу йил содир бўлади. Чунки бу йил Янги йилнинг ватанида қарши олишни режалаштиряпман. Бундан ташқари, бу йил Озода Нурсаидова билан куйлаган дуэтимиз «Мавсум хитлари»да ғолибликни қўлга киритди. Шунинг учун Янги йилни янада, кўтарингки руҳда кутиб олсам керак.
Достон Эргашев
— Байрам билан боғлиқ унутилмас воқеалар жуда кўп бўлган. Масалан. Бир йили байрамни тирбандликда қолган машинам ичида кутиб олганман. Шукрки, 3 йилдан буён байрамни оила даврасида нишонлаш насиб этяпти.
Улуғбек Раҳматуллаев
— Байрамни ҳеч қачон ёмон хотиралар билан эсламаслик керак. Қувончли кундан ҳамиша халқ хизматида эканлигимдан хурсандман. Аммо бир йил чарчаб, ухлаб қолганман. Эрталаб уйғонсам, Янги йил аллақачон кириб бўлган экан.
Изоҳ (0)