2022-yil kim uchundir unutilmas, quvonchli lahzalarga boy bo‘ldi, kimlardir uchun sinovli keldi, yana kimlardir esa bu yorug‘ olamni tark etdi. Yo‘qotilgan insonlar orasida san’at va madaniyat sohasida sermahsul ijod qilib, muxlislari qalbidan joy olgan mashhurlar ham bisyor.
Sanobar Matmurodova
O‘zbekistonda xizmat ko‘rsatgan artist Sanobar Matmurodova 11-yanvar sanasida bu yorug‘ olamni tark etdi.
Xalq ardog‘idagi xonanda Sanobar Matmurodova 1968-yilda Xorazm viloyatining Bog‘ot tumanida tug‘ilgan. O‘zbekiston xalq artisti Olmaxon Hayitovaga shogird tushgan.
Xonanda 1994-yilda Samarqand davlat universitetining musiqa fakultetida tahsil olgan va shundan keyin O‘zbekiston davlat filarmoniyasi Samarqand viloyat bo‘linmasida ish faoliyatini olib borgan. Sanobar Matmurodova “Akajon”, “Onam derman”, “San garak” kabi bir qator qo‘shiqlari o‘zbek xalqi tomonidan sevib tinglanadi.
Sharof Boshbekov
O‘zbekistonda xizmat ko‘rsatgan madaniyat xodimi, “Mehnat shuhrati”ordeni sohibi, taniqli dramaturg, O‘zbekiston Yozuvchilar uyushmasi a’zosi Sharof Boshbekov 2022-yilning 26-yanvar kuni olamdan o‘tdi.
Sharof Boshbekov 1951-yil 4-yanvarda Samarqand viloyati Bulung‘ur tumani G‘ubir qishlog‘ida tug‘ilgan. 1974-yili Toshkent teatr va rassomchilik san’ati institutini tamomlagan. Uning “Temir xotin” komediyasi nafaqat respublikada, balki boshqa mamlakatlar teatrlarida ham sahnaga qo‘yildi. Adib drama va kinoqissalardan iborat “Tanlangan asralar” kitobi uchun 2021-yili O‘zbekiston Yozuvchilar uyushmasining “Yilning eng yaxshi asari” tanlovi g‘olibi bo‘ldi.
Sharof Boshbekov 1996-yili “O‘zbekistonda xizmat ko‘rsatgan madaniyat xodimi” faxriy unvoni, 2001-yili “Mehnat shuhrati” ordeni bilan taqdirlangan.
Viloyat Oqilova
O‘zbekiston xalq artisti Viloyat Oqilova 2-fevral kuni 84 yoshida vafot etdi.
Viloyat Oqilova 1937-yil 12-oktabrda Samarqand viloyatida, O‘zbekiston xalq artisti Isoxor Oqilov oilasida tug‘ilgan. 1958—1994-yillarda O‘zbekiston Davlat filarmoniyasida raqqosa, baletmeyster, 1994—1996-yillarda “Turkiston” saroyida, 1996-yildan O‘zbekiston xorijiy mamlakatlar bilan madaniy-ma’rifiy aloqalar jamiyatida baletmeyster bo‘lgan.
Raqqosa sifatidagi faoliyati davomida “Zang”, “Larzon”, “Shodlik”, “Xorazm lazgisi”, “Tojik go‘zali”, “Pomir raqsi”, “Afg‘oncha”, “Dilrabo”, “Shodiyona” kabi bir qancha raqslarni ijro etgan.
Jo‘raxon Po‘latov
O‘zbekistonda xizmat ko‘rsatgan artist Jo‘raxon Po‘latov 16-fevral kuni 88 yoshida bu yorug‘ olamni tark etdi.
Jo‘raxon Po‘latov 1934 yilda Farg‘ona viloyatining Qo‘qon shahrida tavallud topgan. U askiya sohasida sermahsul ijod qilgan. Askiyachi uzoq yillar madaniyat sohasining turli yo‘nalishlarida, xususan, Qo‘qon shahar musiqali drama teatrida faoliyat yuritdi.
To‘ti Yusupova
O‘zbekiston xalq artisti To‘ti Yusupova 2022-yilning 15-mart sanasida 86 yoshida vafot etdi.
Ma’lumot uchun, To‘ti Yusupova 1936-yilning 10-mart kuni Samarqand viloyatida tavallud topgan. Toshkent teatr va rassomlik institutini tamomlagan. 1957-yildan o‘zbek milliy akademik drama teatrida faoliyat yuritgan. Shuningdek, aktrisa kinoda samarali faoliyat yuritgan.
To‘ti Yusupova 1994-yilda O‘zbekiston xalq artisti unvonini olgan, 2020-yilda “Mehnat shuhrati” ordeni bilan taqdirlangan.
Maryam Ixtiyorova
O‘zbekiston xalq artisti Maryam Ixtiyorova 22-mart kuni bu yorug‘ olamni tark etdi.
Ma’lumot uchun, O‘zbekiston xalq artisti Maryam Ixtiyorova 1939-yil Xorazm viloyati, Yangibozor tumanida dunyoga kelgan. 1959-yildan bugunga qadar Muqimiy nomidagi O‘zbek davlat musiqali teatri aktrisasi sifatida faoliyat yuritgan. 1997-yili O‘zbekiston xalq artisti unvoniga sazovor bo‘lgan edi.
Lutfulla Sa’dullayev
O‘zbekiston xalq artisti Lutfulla Sa’dullayev 10-aprel kuni vafot etdi.
Lutfulla Sa’dullayev 1940-yil 18-dekabrda Toshkent shahrida tug‘ilgan. 1965-yil Toshkent teatr va rassomchilik san’at institutini tugatgan. 1963—2007-yillarda Respublika yosh tomoshabinlar teatri, Abdulla Qahhor nomidagi satira teatrlarida aktyor bo‘lib faoliyat ko‘rsatgan.
Faoliyati davomida 200 ga yaqin spektakllarda bir-biridan esda qolarli rollar ijro etadi. Lutfulla Sa’dullayev uzoq yillik ijodiy faoliyatida davomida o‘z hayoti va ijodidan hikoya qiluvchi, ustozlari, marhum hamkasblari haqidagi xotiralari jamlangan “Qismat”, “O‘kinch”, “Meni kechir” nomli kitoblarini nashrdan chiqargan.
Ravshan Namozov
O‘zbekistonda xizmat ko‘rsatgan artist Ravshan Namozov 2022-yilning 24-sentabr sanasida bu yorug‘ olamni tark etdi.
O‘zbekistonda xizmat ko‘rsatgan artist Ravshan Namozov 1961-yilning 10-iyulida Surxondaryo viloyatining Termiz shahrida tug‘ilgan. Termiz musiqa bilim yurtini tamomlab, otasi — O‘zbekistonda xizmat ko‘rsatgan artist Abdurahmon Namozov va Shokir Mahmudovlardan saboq olgan. U faoliyatini 1989-yili tashkil etilgan “Qars” guruhida boshlagan.
U 1985-yil Germaniya o‘tkazilgan “Yoshlar festivalida” va 1989-yili Olmaota shahrida tashkil etilgan “Osiyo ovozi” ko‘rik tanlovida Grand-Prini qo‘lga kiritgan. 1991-yildan buyon yakkaxon ijod qilayotgan xonanda 1993-yili O‘zbekistonda xizmat ko‘rsatgan artist unvoni bilan taqdirlangan.
Davron G‘oyipov
O‘zbekistonlik taniqli rok-pop yulduzi Davron G‘oyipov 7-oktabr kuni, o‘z tug‘ilgan kunida vafot etdi.
Davron G‘oyipov 1961-yil 7-oktabrda tug‘ilgan. Maktabni bitirganidan keyin 1978-yilda u “Yalla” guruhiga bas gitarachi sifatida taklif qilinadi. 1980-yilda Davron G‘oyipov boshchiligida O‘zbekistondagi ilk rok guruhi — “Original” tuziladi. 1980-yillar boshlarida ijro etilgan “Bu nima bu?” qo‘shig‘i guruhga katta mashhurlik olib kelgan. Qo‘shiq asosida keyinroq film ishlangan va bosh rolni Davron G‘oyipov ijro etgan.
Bundan tashqari “Qaydasan”, “Kerak emas shahlo ko‘zlaring”, “Otkritoye okno” kabi qo‘shiqlar ham muxlislar ko‘ngillaridan joy olgan.
Haydar Muhammad
O‘zbekiston Yozuvchilar uyushmasi a’zosi, taniqli shoir va dramaturg, “Do‘stlik” ordeni sohibi Haydar Muhammad 9-oktabr kuni 86 yoshida yorug‘ olamni tark etdi.
Haydar Muhammad 1936-yili Toshkentda tug‘ilgan. 1966-yilda Nizomiy nomidagi Toshkent davlat pedagogika institutining kechki filologiya bo‘limini tugatgan. 1965—1976-yillarda O‘zbekiston teleradiosida muharrir, 1976—1980-yillarda Madaniyat ishlari vazirligida mas’ul vazifalarni bajargan. Ko‘p yillar Hamza nomli Akademik drama teatrida adabiy emakdosh vazifasida xizmat qilgan.
Dramaturg tarjimasida ozarbayjon dramaturgi Anorning “Zanjir yoki qiyofalar” (Muqimiy teatri), turkman dramaturgi H. Muxtorning “Nevarali kelin” (Samarqanddagi H. Olimjon nomli teatr), boshqird dramaturgi Farid Bogdanovning “Tungi mehmon” (Hamza nomli o‘zbek Davlat akademik drama teatri) kabi asarlari o‘zbek sahnasiga chiqqan.
Jasur Rafiqov
“Ummon” guruhining sobiq xonandasi 14-noyabr kuni saraton kasalligidan vafot etdi.
Ma’lumot uchun, xonanda Jasur Rafiqov 1991-yilning 30-sentabr sanasida Toshkent shahrida tavallud topgan. U bolalikdan birga voyaga yetgan do‘stlari Zohid Risqiyev va Shohrux bilan “Ummon” guruhida ijod qilib ko‘plab xit taronalarni ijro etgan.
Guruh 2007-yilda “Sokin tun” nomli taronasini ommaga taqdim etgandan keyin mashhurlikka erishdi. “Ummon” guruhining “Qanday unutding”, “Yo‘q”, “Boylik”, “Do‘st”, “Kim deya” taronalari va boshqa ko‘plab musiqalari millionlab muxlislarning qalbidan joy oldi.
Mavzuga doir:
Izoh (0)