АҚШ ҳукумати янги ҳарбий ёрдам пакети доирасида Украинага Bradley жанговар машиналарини юбориш имкониятини муҳокама қилмоқда. Бу ҳақда Bloomberg ўз манбаларига таяниб хабар берди.
Манбаларга кўра, якуний қарор қабул қилинганича йўқ. Агар у ижобий бўлса, Киев қачон жанговар пиёда машиналаридан фойдаланишни бошлаши аниқ эмас.
Bradley жанговар машиналари пиёда аскарлар ва разведкачиларни ташишга мўлжалланган. Оқ уй уларнинг юборилиши эҳтимоли юзасидан изоҳ берганича йўқ.
Ўтган ҳафта АҚШ Конгрессига 2023-молия йили учун бюджет ҳақидаги қонун лойиҳаси киритилди, у Украинага яна 44,9 миллиард долларлик ёрдамни ўз ичига олади. 2022 йилда Киев жами 120 миллиард доллардан ортиқ ҳажмда ёрдам қабул қилди. Украина ҳукумати Вашингтон 2023 йилдан кейин Киевни қўллаб-қувватлашни тўхтатиши мумкинлигини тахмин қилмоқда.
Аввалроқ Украина АҚШдан ATACMS ракеталарини сўрагани, бироқ рад жавобини олгани хабар берилганди. АҚШ президенти Жо Байден билан учрашувда Украина президенти Владимир Зеленский Киевга узоқ масофали ATACMS ракеталарини етказиб бериш масаласини кўтарган. АҚШ бундай қурол вазият кескинлашишига сабаб бўлиши мумкин, деган позициясини сақлаб қолган ва фикрини ўзгартирмаган.
Изоҳ (0)