Amerikalik toksikolog Devid Smit Tbilisi sudida ko‘rsatmalar berdi, u yerda Gruziya sobiq prezidenti Mixail Saakashvilining sog‘lig‘i yomonlashgani tufayli, unga nisbatan hukmni kechiktirish haqidagi murojaat muhokama qilinmoqda. Bu haqda “Gruziya-Onlayn” xabar bermoqda.
Mutaxassisning so‘zlariga ko‘ra, Saakashvili og‘ir metallar bilan zaharlangan. Uning aytishicha, miyaga, xususan, oq moddaga zarar yetishi natijasida kuchayib boruvchi demensiya kelib chiqqan.
“Mening fikrimcha, u turli metallar bilan, shu jumladan, simob, mishyak va bariy bilan zaharlangan, ular yetarlicha jiddiy toksik effektga ega. Og‘ir metallarning bunday turlari muayyan vaqt oralig‘idan keyin organizmdan chiqib ketadi va mana shu jarayonda ular turli organlarni zaharlaydi. Natijada uning bosh miyasiga zarar yetgan”, — dedi Smit.
Shifokor qayd etishicha, sobiq prezidentda periferik nevropatiya (bosh miyadan tashqaridagi asablarning zararlanishini) va mushaklar atrofiyasi kuzatilmoqda. Shuningdek, ovqat hazm qilish tizimi, jigar, yurak va buyrak kabi organlarga ham zarar yetgan.
Tokiskolog ogohlantirishicha, Saakashvilining qonidagi og‘ir metallar nogironlikka va o‘limga sabab bo‘lishi ham mumkin. Mutaxassisning so‘zlariga ko‘ra, sobiq prezident Tbilisidagi klinikada munosib davolanayotgani yo‘q. Smit Gruziyada ixtisoslashtirilgan muolajalar olish mumkin bo‘lgan tibbiy muassasa yo‘qligini ta’kidladi. Shu sababli Saakashvili oliy kvalifikatsiyaga ega klinikaga o‘tkazilishi kerak, bunday muassasalar, masalan, AQSHda bor, dedi u.
Gruziyaning sobiq prezidenti qamoqxonada ikki marta ochlik e’lon qilish aksiyasi tufayli sog‘lig‘i yomonlashgani uchun 2022-yil may oyi o‘rtalaridan buyon Tbilisidagi “Vivamed” klinikasida yotibdi. Mixail Saakashvili derazalari panjarali palatada va qurollangan qo‘riqchilar nazoratida saqlanmoqda.
Siyosatchining onasi Giuli Alasaniya tibbiy hisobot natijalariga tayanib, 19-noyabr kuni Saakashvilining tanasida og‘ir metallar, jumladan simob, bor va talliy izlari topilganini ma’lum qilgan.
Sobiq prezident 2021-yil 1-oktabrda Gruziyada hibsga olingan, unga nisbatan bir qancha jinoiy ishlar bo‘yicha tergov harakatlari olib borilmoqda. Siyosatchi bankir Sandro Girgvliani o‘ldirilishi va deputat Valeriy Gelashvilining kaltaklanishi ishlari bo‘yicha sirtdan sudlangan. Birinchi holatda Saakashvili uch yilga, ikkinchisida olti yilga ozodlikdan mahrum etilgan.
Bundan tashqari, u 2007-yil 7-noyabrdagi muxolifat mitingini tarqatib yuborish, “Imedi” telekompaniyasining pogromi va davlat byudjeti mablag‘larini o‘g‘irlash ishlarida ayblanuvchi deb topilgan va bu ayblovlar hali ham sudda ko‘rib chiqilmoqda.
Bosh vazir Irakliy Gariboshvili, Mixail Saakashvilini uzoq vaqt qamoqda qolishi hamda butun jazo muddatini o‘tashini ta’kidlagan.
Mavzuga doir:
Izoh (0)