Moldova hukumati Ukrainadagi urush boshlanganidan keyin Rossiya bilan munosabatlarni to‘xtatgan. Bu haqda mamlakat prezidenti Mayya Sandu Moldova 1 telekanali efirida ma’lum qildi.
“Saylovda qatnashgan paytlarimizda Rossiya bilan hamkorlik va munosabatlarni rivojlantirish tarafdori edik. Ammo hozir Rossiya rahbariyati bilan barcha darajadagi aloqalar to‘xtatilgan”, — dedi u. Davlat rahbarining aytishicha, bu Ukrainadagi urush bilan bog‘liq.
Sanduning so‘zlariga ko‘ra, mamlakatning keyingi o‘n yillikdagi asosiy maqsadi Yevropa Ittifoqiga qo‘shilish. “Yevropa integratsiyasi – mamlakatimiz loyihasi, bizda erkin va tinch taraqqiyotni ta’minlash, shu bilan birga, aholi turmush darajasini oshirish uchun boshqa imkoniyat yo‘q”, — dedi u. “Ushbu o‘n yillikning oxirigacha Yevropa Ittifoqiga a’zo bo‘lishimiz kerak, deb hisoblayman”.
Moldova Rossiyaning Ukrainadagi harbiy amaliyotini qoralagan. Bundan tashqari, Moldova hukumati mojaro ularning mamlakatiga ham ta’sir qilishi mumkinligidan xavotirlarini bir necha bor bildirgan.
Dekabr oyi o‘rtalarida Moldova Axborot va xavfsizlik xizmati rahbari Aleksandru Mustyatsa Rossiya qo‘shinlarining Ukraina orqali Moldova tomon harakatlanishi xavfini “real va juda yuqori” deb atagandi.
Izoh (0)