Germaniya sobiq kansleri Angela Merkelning fikricha, Rossiya-Ukraina nizosi muzokaralar bilan yakunlanadi. Vaziyatni tartibga solish jarayonidagi ehtimoliy ishtiroki haqidagi savolga javob berar ekan, bu masala kun tartibida yo‘qligini aytdi. Merkelning fikricha, uning Rossiyaga nisbatan siyosati oqilona bo‘lgan, chunki u “hozirgiga o‘xshagan urush”ning oldini olishga qaratilgan edi.
Merkel aytishicha, Ukrainadagi nizo aynan qanday yakunlanishini bilmaydi. “Qachondir muzokaralar orqali tugaydi. Urushlar muzokaralar stoli atrofida yakunlanadi. Majburan qabul qildirilgan sulh bilan (buni boshqa ko‘pchilik qatori men ham istamayman) ochiq va do‘stona suhbat o‘rtasida farq bor”. Boshqa hech narsa qo‘shimcha qilmoqchi emasman”, — dedi sobiq kansler Corriere della Sera Sette jurnaliga bergan intervyusida.
Angela Merkelning fikricha, kansler lavozimida u Rossiya bilan hamkorlik borasida “mantiqqa asoslanib” qarorlar qabul qilgan va bu mantiqni u haligacha oqilona deb hisoblaydi. “Gap hozirgiga o‘xshagan urushning oldini olish haqida borgandi. Bu amalga oshmagani bunga urinib ko‘rish xato ish bo‘lganini anglatmaydi”, — deya qo‘shib qo‘ydi u.
Germaniyaning sobiq kansleri Angela Merkel 7-dekabr kuni Zeit nashriga bergan intervyusida Minsk kelishuvlari “Ukrainaga vaqt berish” uchun kerak bo‘lgani, Kiyev esa bu kelishuvlardan “kuchliroq bo‘lish uchun” foydalanganini aytgandi. Kreml Minsk kelishuvlari “vaqtni cho‘zish” degan fikrga qo‘shilgan. Rossiya prezidenti Vladimir Putin Merkelning so‘zlarini kutilmagan va hafsalani pir qiladigan deb topdi. “Aftidan, hech kim Minsk kelishuvlarining barchasini bajarmoqchi emas”, — dedi u. Ammo Putinning aytishicha, Merkelning so‘zlari Ukrainada “maxsus operatsiya” o‘tkazish to‘g‘risidagi qarorning to‘g‘riligidan dalolat beradi. Uning fikricha, Germaniya sobiq kanslerining gaplari RFga nisbatan aldovni isbotlab beradi. “Maqsad faqat Ukrainani qurol-yarog‘ bilan ta’minlab, jangovar harakatlarga tayyorlashdan iborat bo‘lgani” endi tushunarli bo‘ldi, degan edi u.
Minsk kelishuvlari 2014—2015-yillarda Donbassdagi vaziyatni tartibga solish bo‘yicha Uch tomonlama aloqa guruhi tomonidan qabul qilingan. Uning tarkibiga Rossiya, Ukraina va Yevropa xavfsizlik va hamkorlik tashkiloti vakillari kirgan. Bitimlarni Rossiya, Ukraina, Fransiya prezidentlari va Germaniya kansleri (o‘sha paytda Merkel edi) qo‘llab-quvvatlagan. 2022-yilning oktabr oyida Rossiya sobiq bosh vaziri Sergey Stepashin Merkel Putinni Minsk kelishuvlarini imzolashga “ko‘ndirgan asosiy siyosatchi” bo‘lganini aytgandi.
Izoh (0)