Агар Грузия президенти Михаил Саакашвили ҳибсда вафот этса, Европарламент Грузиянинг Евроиттифоқ таркибига кириш ҳақидаги аризасини маъқулламайди. Бу ҳақда Европарламентнинг польшалик депутати Яцек Сариуш-Вольский маълум қилди, у етакчи фракция — Европа халқ партияси вакилидир.
«Саакашвили ва Грузиянинг ЕИга қўшилиш истиқболлари ўртасидаги боғлиқлик принцип жиҳатидан қатъийдир! Иккала ҳолатни ажратиб бўлмайди. Агар собиқ президент ҳибс остида қолиб, қамоқда вафот этса, Европарламент ҳеч қачон Грузиянинг Евроиттифоққа қабул қилинишини ёқлаб овоз бермайди», — деб ёзди Сариуш-Вольский Twitter’да.
Грузия 3 март куни — Молдова билан бир вақтда ва Украинадан кейин икки кун ўтиб, Евроиттифоққа аъзолик учун ариза берган эди. Июнда Еврокомиссия Грузияга номзод мақомини олиш бўйича тавсиялар беришдан бош тортди ва у муайян шартларни бажарганидан кейингина номзод мақомини олишини айтди.
Грузиянинг собиқ президенти қамоқхонада икки марта очлик эълон қилиш акцияси туфайли соғлиғи ёмонлашгани учун 2022 йил май ойи ўрталаридан буён Тбилисидаги «Вивамед» клиникасида ётибди. Михаил Саакашвили деразалари панжарали палатада ва қуролланган қўриқчилар назоратида сақланмоқда.
Аввалроқ Украина президенти офиси раҳбари Михаил Подоляк Украина томони қамоқ жазосини ўтаётган Грузиянинг собиқ президенти Михаил Саакашвилини қабул қилишга тайёрлигини маълум қилган эди. Подолякнинг сўзларига кўра, Киев Саакашвилининг хавфсизлигини таъминлашга ва уни даволашга тайёр.
Собиқ президент 2021 йил 1 октябрда Грузияда ҳибсга олинган, унга нисбатан бир қанча жиноий ишлар бўйича тергов ҳаракатлари олиб борилмоқда. Сиёсатчи банкир Сандро Гиргвлиани ўлдирилиши ва депутат Валерий Гелашвилининг калтакланиши ишлари бўйича сиртдан судланган. Биринчи ҳолатда Саакашвили уч йилга, иккинчисида олти йилга озодликдан маҳрум этилган.
Бундан ташқари, у 2007 йил 7 ноябрдаги мухолифат митингини тарқатиб юбориш, «Имеди» телекомпаниясининг погроми ва давлат бюджети маблағларини ўғирлаш ишларида айбланувчи деб топилган ва бу айбловлар ҳали ҳам судда кўриб чиқилмоқда.
Бош вазир Ираклий Гарибошвили, Михаил Саакашвилини узоқ вақт қамоқда қолиши ҳамда бутун жазо муддатини ўташини таъкидлаган.
Изоҳ (0)