Kreml Sankt-Peterburgdagi norasmiy uchrashuvda MDH mamlakatlari yetakchilariga hadya qilingan uzuklar yuzasidan izoh berdi.
Rossiya prezidenti matbuot kotibi Dmitriy Peskov ular shunchaki Yangi yil munosabati bilan esdalik sovg‘alari bo‘lganini aytdi. Uning so‘zlariga ko‘ra, Vladimir Putin uzukni taqib yurmoqchi emas.
“Uzuklarga urg‘u berish kerak emas, bu shunchaki oddiy Yangi yil suveniri, buning hech qiziq joyi yo‘q”, — dedi Peskov matbuot anjumanida.
Eslatib o‘tamiz, Sankt-Peterburgdagi norasmiy sammitda MDH mamlakatlari vakillariga Yangi yil tabriklari yozilgan uzuklar sovg‘a qilingani haqida Belarus prezidenti Aleksandr Lukashenkoga yaqin bo‘lgan “Пул Первого” Telegram-kanali xabar bergan edi.
Uzukning o‘rtasiga MDH ramzi tushirilgan, ichki qismiga esa katta harflar bilan “Yangi 2023-yil muborak” degan tabrik yozilgan. Shuningdek, uzukda sammit o‘tkazilgan mamlakat — Rossiya nomini ham ko‘rish mumkin.
Ushbu Telegram-kanalda Lukashenko uzukni taqib olgani aks etgan surat e’lon qilingan. Ammo MDH sammitining boshqa ishtirokchilari qo‘lida uzuk ko‘rinmagan.
26—27-dekabr kunlari Sankt-Peterburgdagi uchrashuvda Hamdo‘stlikning yettita mamlakati — Ozarbayjon, Belarus, Qozog‘iston, Qirg‘iziston, Tojikiston, Turkmaniston va O‘zbekiston prezidentlari Ilhom Aliyev, Aleksandr Lukashenko, Qosim-Jo‘mart To‘qayev, Sadir Japarov, Emomali Rahmon, Serdar Berdimuhamedov va Shavkat Mirziyoyev, shuningdek, Armaniston bosh vaziri Nikol Pashinyan ishtirok etdi.
Mavzuga doir:
Izoh (0)