“Daryo” muxbirlari Toshkent shahridagi alohida ta’lim ehtiyojlari bo‘lgan bolalar uchun ixtisoslashtirilgan 106-sonli maktab-internatida bo‘lib, tarbiyalanuvchilar bilan suhbatda bo‘lishdi. Saxiylar ko‘magida kun sayin hayotga bo‘lgan qiziqishi ortayotgan bolakaylar kelajakdagi orzulari haqida so‘zlab berishdi. Maktab-internatining o‘quv ishlari bo‘yicha direktori o‘rinbosari Malohat Muhammedova jismoniy ehtiyojlari bo‘lgan o‘quvchilarga yaratilgan shart-sharoitlar bilan tanishtirdi.
— Olmazor tumanidagi alohida ta’lim ehtiyojlari bo‘lgan bolalar uchun ixtisoslashtirilgan 106-sonli maktab-internatida respublikamizning turli viloyatlaridan kelgan 379 nafar o‘quvchilar ta’lim, tarbiya olmoqda. Maktab-internatiga o‘quvchilar 6 yoshdan qabul qilinadi. Ular xohishiga ko‘ra, 9 yoki 11 yillik ta’limni tanlashlari mumkin.
Maktab-internatimizda 85 nafar surdopedagoglar faoliyat yuritishadi. O‘quvchilar kunning birinchi qismida ta’lim olishadi, undan keyin qiziqishlariga qarab kasb-hunar o‘rganishadi. An’anaviy davlat maktablariga nisbatan bizda ta’lim berish jarayoni boshqacharoq yo‘lga qo‘yilgan. Ya’ni darsdan keyin mutaxassislar o‘quvchilarning eshitish qobiliyati va talaffuzi ustida ish olib borishadi.
Maktab-internatimizda shashka, shaxmat, futbol, voleybol, basketbol kabi sport to‘garaklari tashkil etilgan. Shu yilning sentabr oyida Varshava shahrida bo‘lib o‘tgan karlar o‘rtasidagi shaxmat bo‘yicha jahon chempionatida uchta o‘quvchimiz ishtirok etib, 2-o‘rinni qo‘lga kiritishdi. Noyabr oyida esa 9-sinf o‘quvchimiz Abbos Umaraliyev qo‘l jangi bo‘yicha o‘tkazilgan Osiyo chempionatida birinchilikni egalladi.Kasbga yo‘naltirish bo‘yicha ham bir nechta to‘garaklar faoliyat yuritadi. Qizlarga pazandachilik, to‘quvchilik, o‘g‘il bolalarga esa kandakorlik va duradgorlik kabi to‘garaklar tashkil etilgan.
Shu yilning oktabr oyida barcha o‘quvchilarga “Zamin” fondi tomonidan individual eshitish apparati tarqatildi. Bu jarayonda ota-onalar ham ishtirok eshitib, bundan quvonishdi. Chunki ular orasida farzandiga zamonaviy eshitish apparatini olib berishga moddiy imkoniyati yetmaydiganlar ham juda ko‘p.“Zamin” fondi maktab-internati o‘quvchilarining bariga bir xil eshitish apparatini sovg‘a qilishdi, ayrimlariga esa implant eshitish apparatlari o‘rnatildi. Bu albatta, o‘quvchilarning eshitishiga ijobiy ta’sir etdi. Ularning o‘qishga bo‘lgan ishtiyoqi ortganiga guvoh bo‘lyapmiz. Eshitgan tovuqlarini nutqi orqali ifodalayotgani bizni yanada quvontiryapti.
Maktab-internatimizda iqtidorli o‘quvchilar ko‘p. Ularning institutga kirishiga ko‘plab grantlar ajratilmoqda. Bu yerni tamomlagan o‘quvchilarimiz qiziqishiga qarab, oliy o‘quv yurtlariga o‘qishga kirishmoqda. Bu yil 5 nafar bitiruvchimiz talaba bo‘lishdi. Ayni kunda ular Toshkent davlat iqtisodiyot universitetida, Toshkent davlat pedagogika universitetida va O‘zbekiston davlat jismoniy tarbiya va sport universitetida tahsil olishmoqda.
Maktab-internatida o‘quvchilarning yaxshi ta’lim-tarbiya olishi uchun barcha sharoitlar yaratilgan. Davlat tomonidan ularga 5 mahal ovqat va qulay sharoitdagi yotoqxonalar tashkil etilgan. Ular bu yerni o‘z uyidek tasavvur qilishlarini istaymiz. Hatto, o‘quvchilarning ko‘pchiligi ta’tilda uyiga borganida ham maktab-internatini sog‘inishayotganini aytishadi, — deydi maktab-internatining o‘quv ishlari bo‘yicha direktor o‘rinbosari Malohat Muhammedova.
Mavzuga doir:
- “Zamin” fondi ko‘magida 2020-yilda eshitish qobiliyatini yo‘qotganlarga implantlarni o‘rnatish bo‘yicha 36 ta operatsiya amalga oshirildi
- “Zamin” fondi “Toza havoning inson hayoti sifati uchun ahamiyati” mavzusida muhokama o‘tkazdi
- “Zamin” fondi Vasiylik kengashi raisi O‘zbekistondagi birinchi gospital turdagi maktabga tashrif buyurdi
Izoh (0)