Xalqaro moviy osmon uchun toza havo kuni arafasida “Zamin” fondi tomonidan BMTning Atrof-muhitni muhofaza qilish dasturi (UNEP), O‘zbekiston Gidrometeorologiya xizmati markazi va Davlat ekologiya qo‘mitasi ko‘magida “Toza havoning inson hayoti sifati uchun ahamiyati” mavzusida muhokama o‘tkazildi.
BMT Bosh assambleyasi 2019-yilda 7-sentabr kunini Xalqaro moviy osmon uchun toza havo kuni deb e’lon qilgan.Havoning ifloslanishi yuqumli bo‘lmagan kasalliklar oqibatidagi o‘limlarning boshqa omillardan keyingi ikkinchi sababiga aylandi. BMT ma’lumotlariga ko‘ra, sayyorada har o‘n kishidan to‘qqiztasi ifloslangan havodan nafas oladi, bu esa, hisob-kitoblarga qaraganda, bir yilda yetti millionga yaqin odam hayotdan bevaqt ko‘z yumishiga olib keladi.
Ushbu xalqaro kun butun jahon hamjamiyatining e’tiborini toza havo muammosiga qaratish, inson salomatligini himoya qilish uchun havo sifati naqadar muhim ekanligini eslatishga xizmat qiladi.
“Zamin” fondi Vasiylik kengashi raisi Ziroat Mirziyoyeva o‘z kirish so‘zida shunday dedi:
Sayyoramiz kelajagi hammamizniki, demak, atrof-muhit holatiga har birimiz javobgarmiz, o‘zimizdan boshlab xususiy sektorgacha, jamoat tashkilotlaridan hukumatlargacha — hammamiz birgalikda ish olib borishimiz shart.Bu borada amallarning katta-kichigi yo‘q, atrof-muhit uchun barcha harakatlar: o‘simliklarga zarar yetkazmaslik yoki kichik daraxt ekish ham, katta korxonalarda chiqindilarni kamaytirish ham o‘ta ahamiyatli.“Zamin” fondi va O‘zbekiston Gidrometeorologiya xizmati markazi tomonidan “Atmosfera havosi ifloslanishi monitoringini avtomatlashtirish” loyihasini amalga oshirish doirasida erishilgan natijalar taqdimot qilindi. Ularning eng asosiylari:
- “O‘zgidromet”ning havo ifloslanishini kuzatish maskanlari (jami 63 ta) va 17 ta hududiy laboratoriyasi yagona tahlil markazasiga birlashtirildi.
- Ma’lumotlarni to‘plash va e’lon qilish uchun barcha uchun ochiq bo‘lgan AirUz platformasi (“monitoring.meteo.uz” veb-sayti va AirUz mobil ilovasi) yaratildi.
- Toshkentda yetakchi Horiba kompaniyasining 2 ta atmosfera havosi ifloslanishini monitoring qilish avtomatik stantsiyasi o‘rnatildi. Stantsiyalarning barcha ma’lumotlari IQAir xalqaro platformasiga integratsiya qilindi.
- Havo ifloslanishini monitoring qilishning beshta xalqaro standarti uyg‘unlashtirildi va joriy qilindi.
- “O‘zgidromet”ning 50 nafardan ziyod xodimi havo monitoringi bo‘yicha zamonaviy axborot tizimlaridan foydalanish va avtomatik stantsiyalarni ekspluatatsiya qilishga o‘qitildi.
Xorijiy mutaxassislar ishtirokida mintaqamizning tabiiy-iqlim xususiyatlarini hisobga olgan holda RM2,5 ва PM10 havoni ifloslantiruvchi moddalarning kontsentratsiyasiga doir milliy me’yorlar ishlab chiqilmoqda.
Tadbirda ta’kidlanganidek, butun mamlakatimiz bo‘ylab havo monitoringining to‘laqonli avtomatlashtirilgan tizimining shakllantirilishi ifloslantiruvchi moddalarni qayd etish, ularning anomal kontsentratsiyalarini aniqlash, shuningdek, tezkor bartaraf etish uchun ifloslantirish manbalarini topish imkonini beradi.
Tadbir ishtirokchilari havo sifati bo‘yicha me’yorlarni qo‘llash borasidagi xalqaro tajriba bilan tanishdilar hamda monitoring yakunida havoni nazorat qilish chora-tadbirlarini eng namunali xalqaro amaliyotga muvofiq holda birgalikda takomillashtirishga kelishib oldi.
Izoh (0)