«Дарё» мухбирлари Тошкент шаҳридаги алоҳида таълим эҳтиёжлари бўлган болалар учун ихтисослаштирилган 106-сонли мактаб-интернатида бўлиб, тарбияланувчилар билан суҳбатда бўлишди. Сахийлар кўмагида кун сайин ҳаётга бўлган қизиқиши ортаётган болакайлар келажакдаги орзулари ҳақида сўзлаб беришди. Мактаб-интернатининг ўқув ишлари бўйича директори ўринбосари Малоҳат Муҳаммедова жисмоний эҳтиёжлари бўлган ўқувчиларга яратилган шарт-шароитлар билан таништирди.
— Олмазор туманидаги алоҳида таълим эҳтиёжлари бўлган болалар учун ихтисослаштирилган 106-сонли мактаб-интернатида республикамизнинг турли вилоятларидан келган 379 нафар ўқувчилар таълим, тарбия олмоқда. Мактаб-интернатига ўқувчилар 6 ёшдан қабул қилинади. Улар хоҳишига кўра, 9 ёки 11 йиллик таълимни танлашлари мумкин.
Мактаб-интернатимизда 85 нафар сурдопедагоглар фаолият юритишади. Ўқувчилар куннинг биринчи қисмида таълим олишади, ундан кейин қизиқишларига қараб касб-ҳунар ўрганишади. Анъанавий давлат мактабларига нисбатан бизда таълим бериш жараёни бошқачароқ йўлга қўйилган. Яъни дарсдан кейин мутахассислар ўқувчиларнинг эшитиш қобилияти ва талаффузи устида иш олиб боришади.
Мактаб-интернатимизда шашка, шахмат, футбол, волейбол, баскетбол каби спорт тўгараклари ташкил этилган. Шу йилнинг сентябрь ойида Варшава шаҳрида бўлиб ўтган карлар ўртасидаги шахмат бўйича жаҳон чемпионатида учта ўқувчимиз иштирок этиб, 2-ўринни қўлга киритишди. Ноябрь ойида эса 9-синф ўқувчимиз Аббос Умаралиев қўл жанги бўйича ўтказилган Осиё чемпионатида биринчиликни эгаллади.
Касбга йўналтириш бўйича ҳам бир нечта тўгараклар фаолият юритади. Қизларга пазандачилик, тўқувчилик, ўғил болаларга эса кандакорлик ва дурадгорлик каби тўгараклар ташкил этилган.
Шу йилнинг октябрь ойида барча ўқувчиларга «Замин» фонди томонидан индивидуал эшитиш аппарати тарқатилди. Бу жараёнда ота-оналар ҳам иштирок эшитиб, бундан қувонишди. Чунки улар орасида фарзандига замонавий эшитиш аппаратини олиб беришга моддий имконияти етмайдиганлар ҳам жуда кўп.
«Замин» фонди мактаб-интернати ўқувчиларининг барига бир хил эшитиш аппаратини совға қилишди, айримларига эса имплант эшитиш аппаратлари ўрнатилди. Бу албатта, ўқувчиларнинг эшитишига ижобий таъсир этди. Уларнинг ўқишга бўлган иштиёқи ортганига гувоҳ бўляпмиз. Эшитган товуқларини нутқи орқали ифодалаётгани бизни янада қувонтиряпти.
Мактаб-интернатимизда иқтидорли ўқувчилар кўп. Уларнинг институтга киришига кўплаб грантлар ажратилмоқда. Бу ерни тамомлаган ўқувчиларимиз қизиқишига қараб, олий ўқув юртларига ўқишга киришмоқда. Бу йил 5 нафар битирувчимиз талаба бўлишди. Айни кунда улар Тошкент давлат иқтисодиёт университетида, Тошкент давлат педагогика университетида ва Ўзбекистон давлат жисмоний тарбия ва спорт университетида таҳсил олишмоқда.
Мактаб-интернатида ўқувчиларнинг яхши таълим-тарбия олиши учун барча шароитлар яратилган. Давлат томонидан уларга 5 маҳал овқат ва қулай шароитдаги ётоқхоналар ташкил этилган. Улар бу ерни ўз уйидек тасаввур қилишларини истаймиз. Ҳатто, ўқувчиларнинг кўпчилиги таътилда уйига борганида ҳам мактаб-интернатини соғинишаётганини айтишади, — дейди мактаб-интернатининг ўқув ишлари бўйича директор ўринбосари Малоҳат Муҳаммедова.
Мавзуга доир:
- «Замин» фонди кўмагида 2020 йилда эшитиш қобилиятини йўқотганларга имплантларни ўрнатиш бўйича 36 та операция амалга оширилди
- «Замин» фонди «Тоза ҳавонинг инсон ҳаёти сифати учун аҳамияти» мавзусида муҳокама ўтказди
- «Замин» фонди Васийлик кенгаши раиси Ўзбекистондаги биринчи госпитал турдаги мактабга ташриф буюрди
Изоҳ (0)