Bolalar gematologiyasi, onkologiyasi va klinik immunologiyasi markazi negizida O‘zbekistondagi ilk gospital maktab — “Mehrli maktab” faoliyat yuritmoqda. 11-may kuni maktabga “Zamin” fondi Vasiylik kengashi raisi Ziroat Mirziyoyeva tashrif buyurdi.
Ushbu maktab “Zamin” fondi tomonidan Maktabgacha ta’lim, Xalq ta’limi va Sog‘liqni saqlash vazirliklari bilan hamkorlikda amalga oshirilayotgan gospital pedagogika sohasidagi katta loyihaning natijasi hisoblanadi. Bu yerdagi sharoitlar bilan tanishib, fond rahbari pedagog va ota-onalarga dalda so‘zlarini izhor qilgan, bolajonlar bilan dildan suhbatlashgan.
Maktab bolaning to‘laqonli reabilitatsiya bo‘lishi, moslashishi va ijtimoiylashishiga, bu jarayonda ota-onalar ham qatnashishiga xizmat qilmoqda. Gospital maktab uchun pedagog va psixologlar tanlov asosida tanlab olingan, ular gospital pedagogika bo‘yicha maxsus treninglardan o‘tgan. O‘qituvchi va murabbiylar jamoasi tibbiy xodimlar bilan yaqindan hamkorlik qilmoqda. Bolalardagi immunitet tanqisligini hisobga olib, maktab o‘ziga xos tibbiy talablarga muvofiq jihozlangan, gipoallergen materiallar bilan ta’minlangan. O‘quv jarayonida faqatgina elektron darsliklar va har bir o‘quvchiga alohida biriktirilgan kitoblardan foydalanilmoqda.
Maktabda Zamin Creative ijod studiyasi ham ochilgan. Unda bolalar musiqa, tasviriy san’at va mediadan saboq olmoqda. IT-laboratoriya va sensorli xona ham bor. Shu bilan birga, maktab to‘siqsiz muhit yaratish uchun moslashtirilgan o‘quv dasturlari, gospital pedagogika sohasida o‘qituvchilarning malakasini oshirish modullari ishlab chiqiladigan va yaratiladigan metodologiya markazi sifatida ham xizmat qilmoqda.
Izoh (0)