O‘zbekistonda yetishtirilib iste’molga chiqarilayotgan mahsulotlarning tarkibi laboratoriya tekshiruvlardan qanday o‘tkaziladi, oziq-ovqat xavfsizligiga qay darajada ta’minlangan? Bu kabi savollarga Hayvonlar kasalliklari tashxisi va oziq-ovqat mahsulotlari xavfsizligi davlat ilmiy markazi direktori Bahriddin Tongyoriqov “Daryo” muxbiriga bergan qisqacha intervyusida aytib o‘tdi.
Mutaxassisning ma’lum qilishicha, markazdagi zamonaviy jihozlar qisqa muddatlarda oziq-ovqat mahsulotlarining tarkibidagi antibiotiklar, pestitsidlar va parazitlarni aniqlab beradi
“Bugungi kunda dunyoda eng katta muammolardan bir oziq ovqat xavfsizligidir. Shu bois har bir shaxs o‘zi iste’mol qilayotgan mahsulotni sifatini bilishga haqli. Qoramollarni davolanganda albatta ularga antibiotiklardan yoki o‘simliklarni himoya qilish uchun pestitsidlardan foydalaniladi”, — dedi Bahriddin Tongyoriqov.
Markaz rahbarining ta’kidlashicha, oziq-ovqat mahsulotlarni yetishtirishda kimyoviy moddalarning me’yoridan ortiq foydalanish organizm uchun og‘ir oqibatlarga olib keladi.
"Hech kimga sir emaski, keyingi vaqtlarda o‘simliklar, poliz ekinlarini yetishtirishda zararkunandalarni yo‘q qilish uchun kimyoviy vositalarni belgilangan normadan ko‘proq ishlatish holatlari bor. Tabiiyki, bu mahsulot bilan birga iste’mol qilingan organizmga kiradi va natijada zaharlanishga olib keladi. Shuningdek, Jahon sog‘liqni saqlash tashkiloti ma’lumotlariga ko‘ra, zararkunandalarga qarshi kurashishda pestitsidlarni ortiqcha qo‘llash odamlarda onkologik kasalliklar kelib chiqishiga sabab bo‘lishi mumkin”, — dedi mutaxassis.
Avvalroq Bahriddin Tongyoriqov sifatli go‘shtni qanday tanlash bo‘yicha tushuntirish bergan edi.
Izoh (0)