Ukrainadagi urush 2023-yilda ham davom etishi mumkin, dedi Turkiya mudofaa vaziri Hulusiy Akar. Uning fikricha, G‘arb davlatlarining Kiyevni qo‘llab-quvvatlayotgani, Rossiya esa o‘z pozitsiyasini yumshatmayotgani shundan dalolat bermoqda.
“Bu urush osonlik bilan tugamaydiganga o‘xshaydi. AQSH, Yevropa va G‘arbning qo‘llab-quvvatlovi davom etmoqda. Shunga muvofiq Ukraina harbiylarini tayyorlashmoqda, rejalar o‘z kuchida qolmoqda va budjetlardan mablag‘ ajratilmoqda. Boshqa tomonda Rossiyadan yangrayotgan bayonotlar. Bularning barini birlashtirsangiz, sulh va tinchlik o‘rnatish uchun barcha yaxshi niyat va istaklarimiziga qaramay, bu urush katta ehtimol bilan 2023-yilda ham davom etadi, desak xato bo‘lmaydi”, — dedi Akar.
Shuningdek, u Turkiya “barcha qo‘shnilari”ning hududiy yaxlitligini qo‘llab-quvvatlashini, Ukrainadagi harbiy harakatlarni zudlik bilan to‘xtatishga chaqirishini ta’kidladi.
Turkiya prezidenti Rajab Toyyib Erdo‘g‘on bir necha bor G‘arb davlatlarini Rossiya bilan muloqotga chaqirgan.
Shuningdek, oktabr oyida Anqara Putin va Zelenskiyni uchrashtirishning hozircha hech qanday imkoni yo‘qligini bildirgani haqida xabar berilgan.
Izoh (0)