Xitoy—Rossiya munosabatlari qoyadek mustahkam, u beqaror xalqaro vaziyat ta’sirida o‘zgarmaydi. Bu haqda Xitoy tashqi ishlar vaziri Van I XXRning 2022-yildagi xalqaro diplomatiyasiga bag‘ishlangan simpoziumda aytib o‘tdi.
“Xitoy va Rossiya o‘rtasidagi munosabatlar qoyadek mustahkamdir. Ular o‘zgalarning aralashuvi va provokatsiyalarga uchmaydi, xalqaro voqealar rivojidagi katta o‘zgarishlardan qo‘rqmaydi”, — dedi Van I.
Shu bilan birga, Xitoy Tashqi ishlar vazirligi rahbari Pekin va Moskva o‘rtasidagi hamkorlik antagonistik emas va hech qanday uchinchi tomonga qaratilmaganini ta’kidladi. “O‘tgan yil davomida Xitoy va Rossiya o‘zlarining asosiy manfaatlarini himoya qilishda bir-birini qat’iy qo‘llab-quvvatladi, siyosiy va strategik o‘zaro ishonch yanada mustahkamlandi”, — qo‘shimcha qildi u.
Van I Xitoy—Rossiya savdo aylanmasi yiliga 200 milliard dollarga yaqinlashayotganini eslatdi. Vazir, shuningdek, Xitoy va Rossiya o‘rtasidagi savdo-sotiqni amalga oshirishda milliy valyutalarda o‘zaro hisob-kitoblar kengayayotganiga ishora qilib, birgalikdagi sa’y-harakatlar bilan amalga oshirilayotgan yirik ikki tomonlama loyihalarning muhim ahamiyatini ta’kidladi.
Rossiya Ukrainada bosqin boshlanganidan keyin Xitoy G‘arb davlatlaridan farqli ravishda Moskvaga qarshi sanksiyalar kiritmadi va sanksiyalarni qoraladi. Shu bilan birga, Xitoy yetakchisi Si Szinpin mojaroga barham berish tarafdori ekanini bir necha bor bildirib, uning siyosiy yechimi barcha Yevropa va Osiyo mamlakatlari manfaatlariga mos kelishini ta’kidlagan.
Bundan tashqari, noyabr oyida bo‘lib o‘tgan G20 sammitida Xitoy rahbari mafkuraviy bo‘linish va bloklar qarama-qarshiligi xavfini ta’kidladi, bu esa, uning so‘zlariga ko‘ra, jahon taraqqiyotiga putur yetkazadi.
Izoh (0)