AQSHda kuchli qor bo‘roni qurbonlari soni 23 kishiga yetdi

AQSH bo‘ylab davom etayotgan qor bo‘roni oqibatida kamida 23 kishi halok bo‘ldi, deb xabar bermoqda NBC. Avvalroq 9 qurbon haqida xabar berilgandi.

Michigan shtati, Bat shaharchasidagi qariyalar uyi atrofida 82 yoshli ayol qor ostidan o‘lik holda topildi, deb xabar beradi mahalliy politsiya.

Kolorado shtatining Denver shahri ma’murlari 22-dekabr kunidan beri ikki kishi ob-havo ta’siridan vafot etganini aytdi. O‘limning yakuniy sababi Denver tibbiy ekspertizasi idorasi tomonidan aniqlanmoqda.

Nebraska shtati patruli ob-havo bilan bog‘liq holda bir kishining o‘limini tasdiqladi. Qo‘shimcha tafsilotlar hozircha oshkor etilmagan. Idora vakili ob-havo bilan bog‘liq 600 dan ortiq hodisalar haqida xabar olganini aytdi.

Oklaxoma va Viskonsin shtatlarida ham ob-havo bilan bog‘liq o‘lim holatlari qayd etilgan.

CNN yozishicha, noqulay ob-havo sharoitida halok bo‘lganlar haqidagi ma’lumotlar 21-dekabr, chorshanba kunidan buyon kelib tushmoqda, bo‘ron 23-dekabr kuni avjiga chiqqan.

Bundan tashqari, mamlakatda elektr energiyasi bilan bog‘liq uzilishlar boshlandi. Elektr uzatilishini kuzatib boruvchi “PowerOutage.us” sayti ma’lumotlariga ko‘ra, 1 million iste’molchi chiroqsiz qolgan vaziyatlar ham bo‘ldi. So‘nggi ma’lumotlarga qaraganda, 500 mingdan ortiq aholi elektr energiyasi bilan bog‘liq muammolarni boshidan kechirmoqda, shularning yarmidan ko‘pi — sharqiy Men shtati aholisidir.

Flightaware portali ma’lumotlariga ko‘ra, so‘nggi ikki kun ichida AQSHda 7,3 mingdan ortiq reyslar bekor qilingan.