Britaniya qiroli Charlz III jinsiy zo‘ravonlik janjalidan keyin ukasi shahzoda Endryuni Bukingem saroyidan haydab yubordi, deb yozmoqda The Sun.
62 yoshli shahzoda Endryuga Londondagi qirollik qarorgohi ofisida ishlash taqiqlandi, deya xabar berdi nashr manbasi. Monarxning ukasiga xizmat qiluvchi xodimlar ishdan bo‘shatiladi.
“Uning saroyda bo‘lishi rasman tugatildi. Qirol buni aniq qilib aytdi. Shahzoda Endryu endi qirollik oilasining amaldagi a’zosi emas. Endi u yolg‘iz”, — dedi The Sun nashriga manba.
Shuningdek, nashr yozishicha, Buyuk Britaniya Ichki ishlar vazirligi shahzoda Endryuni kecha-yu kunduz qo‘riqlash xizmatidan mahrum qilgan, bu esa g‘aznaga yiliga uch million funt sterlingga tushardi.
Eslatib o‘tamiz, 2021-yil avgust oyida amerikalik Virjiniya Roberts Juffre Nyu-York sudiga qirolicha Yelizaveta II ning o‘g‘li shahzoda Endryuni qiz 17 yoshida payti unga nisbatan jinsiy zo‘ravonlik sodir etganlikda ayblab, shahzodaga qarshi ko‘p million dollarlik da’vo qo‘zg‘atgandi.
Endryuning o‘zi bu ayblovlarni rad etadi. Biroq u qirollik oilasi a’zosi sifatidagi rasmiy vazifalarini bajarishdan voz kechishga qaror qilgandi. Keyinchalik Yelizaveta II shahzoda Endryuni unvonidan, harbiy unvonidan va qirollik homiyligidan mahrum qildi.
Avvalroq shahzoda Endryu Virjiniya Juffrega tovon puli to‘lab bergan.
Izoh (0)