Turkiya prezidenti Rajab Toyyib Erdo‘g‘on rossiyalik hamkasbi Vladimir Putin bilan telefon suhbati chog‘ida “don yo‘lagi” orqali oziq-ovqat mahsulotlari va boshqa tovarlarni eksport qilishni taklif etdi. Bu haqda “RIA Novosti” Erdo‘g‘onning kanselyariyasiga tayanib xabar bermoqda.
Kreml matbuot xizmati tomonidan Erdo‘g‘on va Putin o‘rtasida don bitimini kengaytirish ehtimoli haqidagi muhokama quyidagicha ta’riflangan:
“Ukraina donini Qora dengiz portlaridan olib chiqib ketish hamda Rossiya qishloq xo‘jalik mahsulotlari va o‘g‘itlarini eksport qilish haqidagi 22-iyuldagi Istanbul kelishuvlari ijro etilishining borishi ko‘rib chiqildi. Bu kelishuv kompleks xususiyatga ega bo‘lib, eng muhtoj mamlakatlar ehtiyojlarini ta’minlash maqsadida Rossiyadan tegishli yetkazmalar uchun to‘siqlarni bartaraf etishni talab qiladi”.
Shuningdek, Rossiya prezidenti matbuot xizmati bayonotiga ko‘ra, telefon suhbati chog‘ida “Ukraina atrofidagi vaziyat” muhokama qilingan, “Turkiya hududida mintaqaviy gaz xabini yaratish tashabbusi bo‘yicha” fikrlar almashilgan hamda “Suriyadagi vaziyatni tartibga solish muammosiga to‘xtalib o‘tilgan”.
Turkiya prezidenti kanselyariyasi xabariga ko‘ra, Erdo‘g‘on “Ukrainadagi inqiroz iloji boricha tezroq tugashiga umid bildirgan”, shuningdek, “Kurdiston ishchilar partoyasining Suriya shimolidagi faoliyati va Turkiyaga terrorchilik hujumlari kontekstida 2019-yilgi Sochi memorandumiga muvofiq, chegarani kamida 30 km ichkariga qarata terrorchilardan tozalash zarurligi” aytilgan. Erdo‘g‘on kanselyariyasi gaz xabi bo‘yicha muhokamalarga izoh bermagan.
Rossiya yonilg‘isini Yevropaga yetkazish uchun xalqaro gaz xabini yaratishni Turkiya va Rossiya oktabrdan buyon muhokama qilmoqda.
Don bitimi 2022-yil iyulida Istanbulda imzolangandi. Turkiya va BMT vositachilik qilgan, Rossiya va Ukraina bir-biri bilan emas, balki ular bilan bitim tuzgan edi.
Hujjat ikkita qismdan iborat bo‘lib, birinchisi Ukraina qishloq xo‘jalik mahsulotlarini chiqarib ketish bilan, boshqasi esa Rossiyaning shunday mahsulotlari hamda o‘g‘itlari eksportiga cheklovlarni bekor qilish bilan bog‘liq bo‘lgan.
Izoh (0)