Зеленский Байденни Украина ғалаба қозонишига ишонтирган, АҚШдагилар эса буни даргумон деб ҳисобламоқда

Украина президенти Владимир Зеленский Вашингтонга ташриф чоғида АҚШ президенти Жо Байденга ва Конгрессга Украина Россия билан низода ғолиб чиқа олишини исботлашга уринган. Бу ҳақда The Washington Post ўз манбаларига таяниб хабар бермоқда. Газета қайд этишича, америкалик мансабдорлар воқеаларнинг бундай ривожланиши эҳтимоли кам деб ҳисоблайди.

Зеленский ўз ташрифидан «қиш шароитидаги шафқатсиз жанглар фонида ишончсизлик кайфиятидаги қонун чиқарувчилар ва бошқа америкаликлардан қўллаб-қувватлашга эришиш учун» ҳам фойдаланган. Газета эслатишича, Вакиллар палатаси тез орада Республикачилар партияси назорати остига ўтади, унинг вакилларидан баъзилари Украинага кўмакни қисқартириш ёки назоратни кучайтиришни ёқлаб чиқмоқда.

Зеленскийнинг Конгрессдаги нутқини тинглаган демократ сенатор Крис Мёрфи фикрича, унинг гаплари таъсирга эга бўлган. Сенатор Вакиллар палатаси Украинани молиялаштиришни сақлаб қолишни қўллаб-қувватлайди, деган фикрда.

WP ёзишича, Украина президенти бир неча ойлар мобайнида Байденга АҚШга ташриф буюришга тайёрлигини айтиб келган, аммо унинг мамлакатидаги вазият буни декабргача амалга ошириш имконини бермаган. Якуний қарор Жо Байден билан 11 декабрь кунги телефон қўнғироғи вақтида қабул қилинган.

Владимир Зеленскийнинг АҚШга сафари 21—22 декабрь куни бўлиб ўтди. Украина президенти Жо Байден билан учрашди ва Конгресс қаршисида нутқ сўзлади. Зеленский, хусусан, ҳарбий кўмакни оширишни сўради. Байден унинг ташрифи чоғида Киевга Patriot зенит-ракета тизимлари берилишини эълон қилди.

Аввалроқ Зеленский ҳужум операцияларини олиб бориш учун замонавийроқ қурол-яроғлар олишни режалаштиргани, аммо АҚШга ташрифидан кўзланган мақсадга эриша олмагани хабар берилган эди.