Putinning Germaniyadan olib qochilgan Graceful yaxtasi Sankt-Peterburg yaqinida Putinning do‘stlari tomonidan qurilgan maxsus iskalaga berkitilgan, deb yozadi “Mojem obyasnit”.
Urush boshlanishidan biroz oldin ta’mirdan o‘tayotgan yaxta Gamburgni shoshilinch tark etib, Kaliningradga jo‘nagan edi. Va sentabr oyining oxirida Sankt-Peterburgga ko‘chib o‘tdi. U Estoniyaning Saaremaa oroli yaqinida Rossiya qirg‘oq xavfsizligi kemasi hamrohligida u yerga olib o‘tilgan.
Endilikda nomi “Kasatka” (hozirda bortida shunday yozilgan) deb o‘zgartirilgan yaxta Leningrad kransozlik zavodi yonidagi Lomonosov yaqinidagi Karasta daryosida turibdi. Iskala joylashgan joy NP Invest MCHJga tegishli bo‘lib, uning asoschisi “Samarali investitsiyalar bozorini rivojlantirish” notijorat hamkorligidir. Kompaniyaning egalari Putinning azaliy do‘stlari Gennadiy Timchenko va Pyotr Kolbinlardir.
Yaxta 100 million dollarga baholangan, unda basseyn, vertolyot maydonchasi, ikki qavatli kvartira, mehmonlar kabinalari va yashash xonalari mavjud. Egasi Putinning Gelenjikdagi saroyiga aloqador kompaniya ekanligi aniqlandi.
Sankt-Peterburgga ko‘chib o‘tishdan biroz oldin kemada balastli suvni boshqarish uchun yangi uskunalar o‘rnatilgan. Bunday qurilmalarni yetkazib berish sanksiya rejimini buzadi, chunki Graceful iyun oyidan beri AQSH Moliya vazirligining qora ro‘yxatiga kiritilgan.
Bu yaxtadan qimmatroq va kattarog‘i esa do‘stlari tomonidan Putinga sovg‘a qilingan “Sheherazade” edi (140 metrli superyaxta qiymati 700 million dollar), lekin u Yevropada hibsga olingan, shuning uchun “Kasatka” Putinda qolganlarning eng qimmati bo‘lib turibdi.
Izoh (0)