Бутун дунёдан миллиардерлар Рождество ва Янги йил байрамлари арафасида Кариб оролларига келди, натижада бу ҳудуддаги яхталар сони ўтган ойга нисбатан икки баробардан кўпроққа ортди. Бу ҳақда Bloomberg хабар бермоқда.
Агентлик ҳисоб-китобларига кўра, ноябрь охирида ороллар яқинида 81 та яхта бўлган, ҳозир эса Кариб ҳавзасидаги мамлакатларда 200 дан ортиқ яхталар тўпланган.
У ердаги яхталарнинг энг йириги — америкалик бизнесмен ва Geffen Records овоз ёзиш студияси асосчиси Дэвид Геффеннинг (Forbes унинг бойлигини 7,7 миллиард долларга баҳоламоқда) Сен-Бартда лангар ташлаб турган 138 метрли Rising Sun суперяхтаси.
Ундан кейинги ўринда — Британиянинг Виргиния ороллари яқинидаги 117 метрли Infinity яхтаси. Агентлик унинг эгаси кимлигига аниқлик киритмаган, бироқ баъзи маълумотларга кўра, у америкалик миллиардер, Harbour Freight дўконлар тармоғи директори Эрик Шмидтга тегишли, унинг бойлиги эса 9,5 миллиард долларни ташкил этади.
Энг йирик яхталардан яна бири — Канада ва ямайкалик тадбиркор, Portland Holdings инвестиция компанияси раҳбари Майкл Ли-Чиннинг 115 метрли Ahpo яхтаси. Forbes маълумотларига кўра, унинг бойлиги 1,5 миллиард долларга тенг бўлиб, у ҳозирда Сент-Китcда бўлиб турибди.
Байрамлар арафасида дунёнинг бошқа бурчаги — Мальдив оролларида ҳам яхталар кескин кўпайган. У ерга етиб борган 17 та кема орасида энг йириги — 88 метрли Lauren L бўлиб, у украиналик бизнесмен Игорь Коломойскийга тегишли деб айтилмоқда.
Forbes ёзишича, бу йил Густавия портида (Кариб денгизидаги Франциянинг денгизорти ҳудуди Сен-Барт пойтахти) байрамлар мавсуми аввалгидек гавжум эмас, чунки у ерда россиялик олигархларнинг суперяхталари етишмаяпти. Масалан, бизнесмен Роман Абрамовичга тегишлилиги айтиладиган 168 метрли Eclipse суперяхтаси ёки Магнитогорск металлургия комбинати директорлар кенгаши раиси Виктор Рашниковга алоқадор бўлган 139 метрли Ocean Victory анъанага зид равишда бу йил байрам арафасида оролга келмади. Уларнинг иккаласи ҳам Евроиттифоқ ва АҚШ санкцияларига учраган.
Изоҳ (0)