AQSH Tayvanga harbiy yordam paketiga 882 million dollarlik 100 tagacha takomillashtirilgan Patriot havo hujumiga qarshi mudofaa raketalarini qo‘shishni taklif qildi. Bu haqda Bloomberg Davlat departamenti hujjatlariga tayanib xabar berdi.
Gap Tayvanga avvalroq yuborilgan Patriot PAC-3 raketalarining takomillashtirilgan versiyalaridan iborat 100 tagacha raketani yetkazib berish haqida bormoqda.
Bu taklif AQSH va Tayvan o‘rtasida 2010-yilda tuzilgan bitimga qo‘shimcha bo‘ladi, uning potensial umumiy qiymati — 2,81 milliard dollarga teng. Maqsadi esa orolga hududiy yaxlitligini himoya qilish va mintaqaviy barqarorlikka tahdidlar oldini olish imkonini berish uchun, uning raketaga qarshi mudofaa qobiliyatini yaxshilashdan iborat.
Avvalroq AQSH hukumati harbiy yordamning katta qismi Ukrainaga yo‘naltirilgani uchun, Tayvanni barcha zarur qurol-yarog‘ bilan ta’minlay olmasligidan xavotirlanayotgani ma’lum bo‘lgan edi. Vashington Tayvanga qurol-yarog‘ yetkazib berish bo‘yicha qariyb 19 milliard dollarga orqada qolmoqda.
Orol haligacha AQSHdan 208 ta Javelin tankka qarshi majmualari va 215 ta Stinger havo hujumiga qarshi raketa majmualarini olgani yo‘q, vaholanki ular uchun 2015-yil dekabrida buyurtma berilgan.
8-noyabr kuni Tayvan prezidenti Say Inven tez orada Xitoyning Tayvanga bosqini yuz berishi mumkinligini aytdi. Uning so‘zlariga ko‘ra, Xitoy hukumati asta-sekin Tayvan bo‘g‘ozini nazorat ostiga olmoqda, bu esa kelajakda orolni qamalda qoldirishi mumkin.
Oktabr oyi o‘rtalarida Xitoy yetakchisi Si Szinpin Pekin Tayvandagi separatizmga va boshqa mamlakatlarning orol ichki ishlariga aralashuviga qarshiligini aytgandi. Uning ta’kidlashicha, Xitoy rahbariyati Tayvan bilan “tinch yo‘l orqali birlashish” tarafdori, ammo kuch ishlatishni ham istisno qilmaydi.
Izoh (0)