Xitoy yetakchisi Si Szinpin G20 sammitida AQSH prezidenti Jo Bayden bilan ikki tomonlama uchrashuvda Tayvan masalasini Xitoy—AQSH munosabatlaridagi asosiy qizil chiziq deb atadi. Bu haqda Xitoy tashqi ishlar vazirligi saytida xabar berildi.
“Si Szinpin Tayvan masalasining kelib chiqishi va Xitoyning prinsipial pozitsiyasini har tomonlama va tizimli ravishda tushuntirib berdi. U Tayvan muammosi Xitoy manfaatlari orasida asosiy va Xitoy—AQSh munosabatlaridagi o‘tib bo‘lmas birinchi qizil chiziq ekanini aniq qilib ta’kidladi”, — deyiladi xabarda.
TIV Xitoy—AQSH munosabatlari “nol summa o‘yinidan” voz kechishi, qarama-qarshilik emas, balki muloqot ohangini o‘rnatishi, o‘zaro hurmat, tinch-totuv yashash va o‘zaro manfaatli hamkorlikka amal qilishi kerakligini ta’kidladi.
Avvalroq Xitoy Mudofaa vazirligi matbuot kotibi Tan Kefey Xitoy mudofaa vaziri Vey Fenxe “ASEAN” mudofaa vazirlari yig‘ilishi doirasida amerikalik hamkasbi Lloyd Ostin bilan uchrashishga tayyorligini ma’lum qilgandi. “Xitoy tomoni ijobiy kayfiyatda va AQSH bilan fikr almashishga ochiq”, — deyiladi Xitoy Mudofaa vazirligining WeChat akkauntida.
Joriy yilning avgust oyida Tayvan ikki davlat o‘rtasidagi munosabatlarning keskinlashuviga sabab bo‘ldi: AQSH Kongressi Vakillar palatasi spikeri Nensi Pelosi Pekin mustaqilligini tan olmaydigan ushbu orolga tashrif buyurdi. Xitoy uning kelishini davlatning ichki ishlariga aralashish deb hisobladi.
Izoh (0)