Россиянинг Мурманск вилоятидаги «Звездочка» заводи устахонасида турган «Адмирал Кузнецов» крейсери бортида ёнғин содир бўлди. Бу ҳақда Meduza фавқулодда вазиятлар хизмати вакилига таяниб, хабар берди.
Манбаларга кўра, крейсердан 20 киши эвакуация қилинган, ҳеч ким жабрланмаган. Ёнғин сабаблари ҳозирча маълум қилинмаган.
Икки йил аввал, 2019 йил декабрь ойида ҳам Мурманскда таъмирланаётган «Адмирал Кузнецов» бортида ёнғин чиққан эди. Ўшанда икки киши ҳалок бўлган, яна 14 киши жароҳат олган.
2018 йил октябрь ойида эса «Адмирал Кузнецов» таъмирланаётган сузувчи док чўкиб кетган, крейсерда беш метрли тешик ҳосил бўлган.
«Адмирал Кузнецов» — Россиядаги ягона авиаташувчи кема, у 1991 йил бошида фойдаланишга топширилган. 2017 йилда кемани таъмирлаш ва модернизация қилиш режалари эълон қилинди, ўша пайтдаги ишлар камида 20 миллиард рублга баҳоланган эди, бу янги корвет қурилишидан ҳам кўпроққа тушиши таъкидланган. 2021 йилда кема флотга қайтиши кутилганди, аммо бир қатор ҳодисалар туфайли бу саналар орқага сурилди. «Звездочка» заводида крейсерни таъмирлаш қиймати, шунингдек, ишни якунлаш муддатлари ошкор этилмаган.
Изоҳ (0)